Ny Endrikao Tompo Jesoa ô

Ny Endrikao Tompo Jesoa ô,
No feno hatsaran-tarehy kanto indrindra,
Nataon'ny Ray ho heni-tsoa,
Ho santatr'ilay tany vao any aoriana,
Olom-baovao ho antoky ny ho avy,
Hahay hanova izay manatona Azy !
Izay tarafiny handray ny hatsarany,
Izay taratry ny Ray mamiratra aok'izany !

1. Katsahiko ilay masonao mijery,
Mikaroka ireo osa sy ireo very,
Manganohano ka mila hitomany
Mahita ny fahoriana eran-tany. (2)

2. Katsahiko ilay fonao mitia
Mampianatra hahafoy hatramin'ny aina,
Tsy resin-dratsy, tsy resim-pahotana,
Misolo vaika ireo ratram-pahosana. (2)

3. Katsahiko ny vavanao miteny
Feno hamamiana sy hanitra tantely
Afafinao ny Aina sy fitia;
Atsanganao ireo maty tsy nitia. (2)

4. Katsahiko ilay feonao manako,
Onja mahery miantsa an'Izy Ray,
Mihararetra miandrandra tsy an-kiato
Ny fiavian'ny andro hanjakany. (2)

5. Katsahiko ilay tarigetranao
Ny handoro afo izao tontolo izao,
Afom-pitia haneni-kafaliana
Narehitrao tamin'ny Hazofijaliana. (2)

6. Katsahiko, karohiko isan'andro
Ny Endrikao Masoandro andrandraiko
Sady hanilo no hanafana anaty,
Hanjary Aina, sy taratra ho ahy. (2)