Indro ny Tompo Mpanjakantsika fa tamy

Indro ny Tompo Mpanjakantsika fa tamy,
I Kristy Mpamonjy antsika no tamy,
Indro 'lay Tompo Andriamanitsika fa tamy,
Indro Kristy Tompo fa tamy! (indroa)

1 Indro ny Tompo Andriamanitsika fa miroso ka avy amin-kery,
 Izy mahery ka herin-tsandry no hizakany ny tany tontolo:
 He ireto babony sy fanevany misava ny lalan-kombàny!
        Indro Kristy Tompo fa tamy! (indroa)

2 Toy ny mpiandry izy miantso ny ondriny hiraotra ny vilona an-tsaha,
 Raisiny an-tanany dia trotroiny 'zay madinika mbola minono,
 Entiny mora ny reniondriny fa tsy mba dodosany akory!
        Indro Kristy Tompo fa tamy! (indroa)

3 Iza no hamatra ny ranomasina eo an-tanany tahaka ny Tompo?
 Na mahazehy iny lanitra iny, mahafatra ny vovoka am-bata?
 Iza no handanja ny tendrombohitra, hahatatitra havoana holanjaina?
        Indro Kristy Tompo fa tamy! (indroa)

4 Zovy no efa nanoro hevitra, nanilo fanahy azy Tompo?
 Ary nitsangan-kanolo-tsaina hidinihany sy hampianatra azy?
 Taiza ny Tompo no nila olona hanambara izay tokony hataony?
        Indro Kristy Tompo fa tamy! (indroa)

5 Sa nisy koa nampianatra azy hahalala ny hoe fahendrena?
 Z'inona anefa ny firenena fa tsy fasika ambony mizana,
 Ary ny nosy, 'reo nosy maro moa tsy vovo-misidina foana?
        Indro Kristy Tompo fa tamy! (indroa)

6 Fongotra ny ala natao kitay, zary mangadihady i Libàna,
 Tapitra ringana koa ny biby, nefa tsy ampy ny sorona vita.
 Eo anatrehan'ny Tompontsika tsinontsinona ny firenena!
        Indro Kristy Tompo fa tamy! (indroa)

7 Ray ô, endrey 'ty fitiavanao 'zay nasehon'ilay Zanakao:
 Resiny 'lay nanandevo anay: izao vahoaka voafidy izahay!
 Vavolomebelona ny Fanahy, ka ny fotoana no andrasanay
        Indro Kristy Tompo fa tamy! (indroa)