Ianareo mpianatro no fahazavan'izao tontolo izao

Sas :
Ianareo mpianatro no fahazavan'izao tontolo izao e,
Ianareo mpianatro no fahazavan'izao tontolo izao, hoy ny Tompo.  (Mt. 5, 14)

(Sal. 18a)

1 - Ny lazan'ny Tompo ambaran'ny lanitra,
Ny asany kosa torìn'ny habakabaka ;
Ny andro milaza amin'ny andro manaraka,
Ny alina indray mitantara amin'ny alina.
 
2 - Tsy teny lazainy, tsy volana ambarany,
Tsy feo mba manako horenesin'ny sofina :
Kanefa dia tsinjo eran-tany ny baikony,
Miely tsy tana ny hafatra entiny.
 
3 - Jereo ny masoandro nomeny hilasiana,
Dia ny ranomasina izay midadasika ;
Ka nony miseho izy toy ny mpampakatra,
Mifaly toa olom-pandresy eny an-dalany.
 
4 - Ka ny iandohany dia any atsinanana,
Fa ny hilentehany kosa any andrefana ;
Dia indro henika azy ny tany aman-danitra
Ka samy mandray ny hafanana apariakany.
 
5 - Andeha isika hisaotra ny Tompon'ny lanitra,
Ny Ray izay nanao ny masoandro amy toerany,
Ny Zanaka izay masoandro nirahiny
Hanilo an'ireo izay mandray ny Fanahiny.