Ho toy ny emboka eo imasonao anie ny fivavahako

Ho toy ny emboka eo imasonao anie
Ny fivavahako,
Moa ny tanako misandratra,
Ho fanati-takariva.

(Sal. 140)

1 O ry Tompo, antsoiko ianao, mba faingàna  ka tongàva,
 Raha asandratro ny feoko, mba henoy re  izany antsoko.
 
2 Ho toy ny emboka eo imasonao anie ny fivavahako,
 Moa ny tanako misandratra ho fanati-takariva.
 
3 Koa mba ametraho mpiambina ny vavako, ô ry Tompo,
 Ny varavaran'ireo molotro ambeno sy arovy.
 
4 Aza avelanao hirona hankamin'ny ratsy izany foko,
 Ary aza avelanao hivarilavo amin'ny ota.
 
5 Eny, aoka tsy hiaraka amin'ny ratsy izany tenako,
 Ary izay hafinaretany, enga anie mba tsy handramako.
 
6 Aoka hikapoka ahy, hananatra amin'ny fony ny olo-marina,
 Fa izany, diloiko tsy holavina eo an-dohako.
 
7 Amin'izay ny fivavahako tsy atsahatro mihitsy,
 Dia hiampanga sy hitory ny asa ratsin'izy ireo.
 
8 Dia ilay Vatolampy mafy no hitsara azy ireo,
 Izay faly raha nandre ny fitarainako nanao hoe:
 
9 "Toy ny tany izay asaina ka mivava sy mitresaka
 Ny taolanay izay naely teo am-bavan'ny Seoly".
 
10 Fa ianao no andrandrain'ireto masoko, ô ry Tompo!
 Akaikinao no fialofako: aza afoy izany aiko.
 
11 Ka arovy amin'ny fandrika amandrihana ahy ny tenako,
 Ary amin'ny longoan'ny mpisaina teti-dratsy.
 
12 Koa ny saotra asandratray re mba raiso, ô ry Ray;
 Tsy navelanao hotanan'ny Seoly ny Zanakao.
 
13 Fa natsanganao ho Tompon'ny tontolo sy Mpandresy
 Ary ny Fanahy no anomezanao ny fiainana ho anay.