Izay mamboly e, sy izay manondraka
Dia tsinontsinona avokoa e,
Satria ny Tompo ihany
No mampitsimoka ny voa.(1. Kor. 3, 7)
(Sal. 126)
1 Raha tsy ny Tompo no manorina ny trano e,
Zary miasa foana 'zay manorina azy ireny;
Raha tsy ny Tompo no miaro ny tanàna e,
Zary miandry foana ny mpiambina mitily.
2 Eny, sasa-poana ianareo miari-tory,
Taitra vao maraina nefa zara raha mba voky.
Hafa ny olon-tiany, fa matory tsy manahy;
Mbola eo am-pandriana dia tolorany sakafo.
3 Indro koa ny zanaka fa lova avy amy Tompo,
Valisoa tokoa anie 'reo menaky ny aina!
Hery ny tsipìka eny an-tanana mpiady,
Hery koa ny zanaky ny fahatanorana!
4 Sambatra 'zay nahafeno kotra tam'ireny,
Sambatra satria mahazo toky fa handresy:
Tsy hitsanga-menatra raha misy fahavalo,
Hiharihary marina tokoa ny fandreseny!
5 Saotra no atolotra ny Ray miahy antsika,
Dera ho an'ny Zanaka 'zay eo anivontsika:
Ary ny Fanahy 'zay itsofan-drano antsika,
Aoka hoderaina amin'ny asa vitantsika.