(Fandinihana ity fa tsy vavaka hatao am-piangonana tsy akory)
Via crucis! Chemin de croix! Way of the cross (or of sorrows). Izay ilazana azy fa ilay antsoin'ny
Kristianina Katolika hoe : Lalan'ny Hazofijaliana. Vavaka fandinihana ny
fijalian'i Jesoa atao indrindra mandritra ny karemy izy io, handinihana
indrindra ny fijaliany hatreo amin'ny nanamelohana Azy ho faty ka hatramin'ny
nandevenana azy. Misy fijanonana 14 izy io.[1]
Tsy ny
isan'ny Fijanonana na ny Vavaka izay hajain'izay mino an'i Kristy rehetra no
nahalasa ny saiko fa ny fandikana ny crucis
ho hazofijaliana!
Ny Lakroà
dia famantarana milaza ny fihaonan'ny tsipika roa mifanipaka, saro-bidy izay
fihaonana izay indrindra rehefa fifandiparan'ny zavatra roa tsy mitovy.
Ampianarina
antsika (Kristiana) mazàna ny hoe : "Manambara ny fitiavana
an'Andriamanitra (mitsangana) sy ny fitiava-namana (mitsivalana) ny
Lakroà".
Raha izany
ary, lalana manambara fihaonana ny Via crucis ary izay fihaonana izay no
mila dinihina mba hahatsapana ny halehiben'ny fitiavan'ilay nahafoy ny ainy
hanavotra ny mpanota.
Raha
isak'ireo fijanonana ireo no hoentina mijery ireo didy roan'ny Fitiavana ireo
dia ho hafa tanteraka ny hevitra hiompanan'ny saina eo am-pandinihana ny lalana
miakatra ny Kalvery. Hikarohana ireo fihaonana sy fifanoherana ambaran'ny
lakroà! Izay sampanan-dalana hisafidianana hitia an'Andriamanitra ao amin'ny
olombelona.
Fijanonana 1
: Ny olombelona manameloka an'Andriamanitra :
Izany no Fihaonan'ny mpanota amin'ny tsy
manantsiny!
Impiry moa
no helohin'ny maty eritreritra ny tsy
manantsiny?
Fijanonana II : Andriamanitra mandray an-tsoroka ny
sazim-pahotan'ny olombelona noho ny
fitiavana (satria araka ny fikarohana sasany dia ny hazo mitsivalana ihany no
nentin'i Jesoa).
Izany no fihaonan'ny Hasambarana sy ny fijaliana! Manambara ny porofom-pitiavana entin'i Kristy hamonjena antsika.
Fijanonana III : i Jesoa ilay tompon'ny Fanjakana sy ny hery
mitrosona amin'ny tany.
Izany no Fihaonan'ny hery sy ny fahosana Mampianatra
antsika ny fanetren-tena.
Fijanonana IV : Maria miombona alahelo ami'i Jesoa.
Izany no Fihaonan'ny Reny sy ny Zanaka.
Tsy mahafoana ny rohy ihavanana ny fijaliana sy ny fahoriana. Firifiry anefa ny mpianaka tsy mifampiteny intsony noho ny zava-mitranga izay heverina ho fatiantoka na henatra amin'ny fiaraha-monina!
Fijanonana V : ny olombelona mitondra tsy fidiny ny
fijaliana
Izany no Fihaonan'ny Avotana (i Simona) sy ny Mpanavotra (Jesoa).
Efa mandray anjara amin'ny asam-panavotan'i Kristy ireo nahazo ny famonjeny. Voaantso handray anjara amin'ny fijaliany isika mba hahatsapantsika ny fitiavany! Ny hamafin'izay niaretany ho antsika.
Fijanonana VI
: Veronika mamafa ny tavan'i Jesoa
Io no Fihaonan'ny Voaary endrik'Andriamanitra (Veronika
= sary tsy misy osoka) sy ny Teny nahariana ny Tontolo (Jesoa).
Impiry no
omen'i Jesoa "occasion"
isika hizaha ny endriny ao amin'ny madinika sy ny mahantra! Kanefa na ilay
endrik'Andriamanitra nahariana antsika aza tsy tandrovintsika akory!
Fijanonana VII
: Ny halemena mianjady amin'ny Mpanavotra.
Nahoana no averina indray ity fijanonana ity? Satria mihaona ao amintsika matetika ny avonavona sy ny tsy fahombiazana, izay mazàna mahatonga antsika tsy hitondra tena intsony araka ny hitsi-po fa ny hitsi-piainana, tsy araka ny evanjely fa araka ny masom-bahoaka!
Fijanonana VIII
: Ny sentosenton-behivavy tia vavaka mitsetra
sy
mangoraka an'i Jesoa!
Izany no Fihaonan'ny sento sy ny tolona, ny zo sy ny andraikitra
Impiry isika no mitsetra olona mijaly saingy mafy fo velona hanampy azy hiala amin'ny fijaliany! Matetika dia isika ihany no fitaovana hanatanterahan'Andriamanitra ny vavaka ataontsika!
Fijanonana IX
: Ny harerahana mianjady amin'ny Zanak'Andriamanitra.
Mbola miverina fanintelony ny fijalian'i Jesoa. Telo manambara ny zavatry ny lanitra! Fa manambara ihany koa ny hafenoana. Nahoana no averimberina tahaka izany ity fihaonan'ny hery sy ny fahosana ity?
Satria tsy afaka ny hiambo hahavita na hanavo-tena isika. Raha tsy Izy tsy mahefa na inona na inona isika.
Fijanonana X
: Jesoa aboridana
Io no Fihaonan'i Adama sy ilay Adama vaovao = Ilay henatra nandroahana an'i Adama sy Eva tao am-paradisa honeran'i Jesoa.
"Nahoana no miafina ianao? Satria mitanjaka aho." I Kristy anefa dia nanaiky hianjahanja eo imason'ny tontolo, eo imason'olom-pady, mba hanokatra indray ny varavaran'ny Paradisa ho antsika.
Fijanonana XI
: Jesoa asandratra eo ambony hazofijaliana
Izany no Fihaonan'ny Tany sy ny lanitra = Fihaonan'ny Tantanana sy ny fantsika hampikambana an'i Jesoa sy ny Hazo ary Jesoa asandratra eo ambony hazofijaliana.
Rehefa tafasandratra hiala amin'ny tany aho, dia hitarika ny olon-drehetra hanatòna ahy! Indrisy anefa, mazàna tsy manatona (s'approcher) an'i Jesoa no ataontsika fa ny manantona (pendre) ny hazofijaliany ihany na eny an-tratra na eny amin'ny sofina na ao an-trano! Misy heviny ho antsika ve ny lakroà!!!
Fijanonana XII
: I Jesoa mametraka ny ainy eo
am-pelatanan’ny Ray :
Izany no FIHAONAN'ny
Fiainana sy ny Fahafatesana!
Firifiry olona mihevitra fa ny fahafatesana no faran’ny fiainana ary manao izay tratry ny saina hitadiavana ny odifaty
I Jesoa ilay Tompon'ny aina, mametraka ny fanahiny eo am-pelatanan'ny Ray
Fijanonana XIII
: Ny fatin’i Jesoa eo ampofoan’ny
reniny :
izany no FIHAONAN'ny
Famoizam-po sy ny fanantenana!
Tsy i Kristy irery no nijaly fa ireo rehetra an’i Kristy. Tsy manafoana ny fijaliana ny fanaraha-dia Azy fa fiaraha-mitondra ny Jioga isan’andro isan’andro miaraka aminy!
Fijanonana XIV
: Fihaonan'ny Hazavana amin'ny haizina.
Ny fasam-bao mandray ilay Tompon’ny aina :
izany no FIHAONAN'ny haizina sy ny Hazavana!
Efa nosantarin’i Jesoa ny farahidin’ny fijaliana! “raha tsy maty ny voa
afafy…”
Ireo fihaonana ireo dia sedraintsika eo amin'ny andavanandrom-piainana avokoa! Izany no maha-Kristiana
[1] Jereo eto ny fijanonana araka ny mahazatra sy ny fijanonana araka ny soratra masina