Asabotsy Herinandro II

ANTSA

1. Masina Maria ô, Renin'Andriamanitra,

Hitehirizo fo madio aho

Toy ny loharano tsy misy tsingala,

Tsy misy tsingala.

2. Masina Maria ô, Renin'Andriamanitra,

Fo tsotra homena ahy

Tsy hikombona amin'ny dona mandratra,

Ny dona mandratra.

3. Masina Maria ô, Renin'Andriamanitra,

Fo miantra no angatahiko

Tsy mivadika, tsy sasa-mizara,

Tsy sasa-mizara.

4. Masina Maria ô, Renin'Andriamanitra,

Fo mahay mankasitraka

Tsy mitana an-dalom-po ny amin'ny ratsy,

Ny amin'ny ratsy.

5. Masina Maria ô, Renin'Andriamanitra,

Mba omeo hamoram-po aho

Hietry tena hatrany na misy mpitia,

Na tsisy mpitia.

6. Masina Maria ô, Renin'Andriamanitra,

Mba ho fo tsy mora tofoka,

Fa hisokatra amin'izay mankahala,

Izay mankahala.

SALAMO 131 (130)

Adala nomen-tanan’ondry isika kristianina, ka na soloina ofany aza

tsy tiana, mahazo ny Fiadan’i Kristy.

Sas: Ento ny jiogako, mianara amiko,

fa malemy fanahy aho,

Ka hahita fiadanana ianao. (Mt 11,29)

Andininy:

1. Tsy mba miavona ny foko, ô ry Tompo ô,

Ka ny masako mijery tsy mianjona!

Ireo zavatra vaventy tsy enjehiko,

Ireo avo tsy sahaza alaviriko!

2. Afa-diana ny fanahiko: mamitsaka,

Toy ny zaza afa-po an-tratran-dreniny

Matokia ny Tomponao, ô ry Jakôba ô

Hatrizao sy amy taona tsisy fetrany!

3. O ry Ray, Ianao mpiahy ny madinika,

O ry Zanaka, mpitondra fahafahana!

Ry Fanahy, loharanom-piadanana,

Ny fanahiko no miantsa: voninahitra!

Sas: Ento ny jiogako, mianara amiko,

fa malemy fanahy aho,

Ka hahita fiadanana ianao.

na:

SALAMO 4

Ray ô, efa natsanganao ho zanaka tahaka ny Zanakao izahay, ka ho toy ny mpirahalahy mianala miaraka Aminy: Izy no tokinay ary izahay kosa ho tokiny.

Sas: Aoka tsy hatahotra ianareo, na dia vitsy aza ianareo,

fa sitraky ny Rainareo ê ny hanome ny fanjakany. (Lk 12,32)

Andininy:

Raha miantso aho, valio, Andriamanitro

Fa Ianao re no fahamarinako

Ary Ianao no namonjy amy sarotra

Koa iantrao ary henoy ny antsoantsoko.

Ianareo kosa ho'aho, dia maninona

No dia tia zava-poana sy fitaka?

He ny Tompo miahy ny olo-maminy

Rah'vao miantso Azy Tompo aho dia henony.

Mangovita atsaharo ny heloka,

Mandiniha eo am-pialana sasatra;

'Zay fanatitra mendrika atolotra

Ary dia itokio Andriamanitra.

Iza hoe no hampahita fiadanana?

Asehoy ny endrikao Andriamanitra.

Ny hafaliana nomenao, ry Tompoko,

Mihoatra ny azy amy taom-pamokarana.

Raha vao mandry aho matory am-piadanana

Fa Ianao ihany manko no tokiko.

Eny isaorako Ianao Andriamanitro

Zanakao no nitondra fiadanana.

Sas: Aoka tsy hatahotra ianareo, na dia vitsy aza ianareo,

fa sitraky ny Rainareo ê ny hanome ny fanjakany.

SALAMO 134 (133)

Ny Tompo, miandry antsika hatrany, hangata-bonjy Aminy sy hisaotra Azy, na andro na alina.

Sas: Tompo ô, ampianaro mivavaka izahay. (bis) (Lk 11,1)

Andininy:

Ianareo rehetra manompo ny Tompo, misaora ny Tompo.

Ianareo 'zay manompo ny Tompo amin'ny alina an-toerany Masina.

Asandrato ny tananareo ka misaora ny Tompo Tsitoha

Ary aoka izy anie hitso-drano anareo 'zay eto Siona.

Koa andeha re hidera ny Ray 'zay mitahy sy miambina antsika

Ary hisaotra ny Zanaka sy ny Fanahy 'Zay niantsoana antsika.

Sas: Tompo ô, ampianaro mivavaka izahay. (bis)

TENIN'ANDRIAMANITRA (1 Tes 5,2-3)

Diso fantatrareo loatra fa ho avy toy ny mpangalatra amin'ny alina ny andron'ny Tompo. Amin'ilay hilazan'ny olona hoe: «Miadana sy milamina isika izao», amin'izay indrindra no ho avy tampoka ny loza, tahaka ny manjo ny vehivavy mihetsi-jaza, ary tsy hisy ho afa-mandositra.