Asabotsy Herinandro I

ANTSA

Eo anivontsika mandrakariva i Kristy Hazavana, dia ho maizina am-pototry ny jiro ve isika?

Fiv: Nony nisasaka ny alina, dia nisy niantso hoe:

„Inty tamy ny Mpampakatra ka mitsangana re

Eny mandehana mitsena an'i Kristy, mandehana ka tsenao i Kristy!“ (Mt 25,6)

1 Tao anaty haizim-pito re ny foko

No nikatsaka ny endriky ny Tompoko

Nihoron-koditra aho fa maizina ny lalako

Rahoviana aho no hihaona amin'ny Tompoko?

Fiv: Nony nisasaka ny alina, dia nisy niantso hoe:

„Inty tamy ny Mpampakatra ka mitsangana re

Eny mandehana mitsena an'i Kristy, mandehana ka tsenao i Kristy!“

2 Teo anivom-pijaliana ny fanahiko

No nikaroka ny tanan'Izy Tompoko:

Varahontsana aho fa lany re ny heriko,

Rahoviana aho no hihaona amin'ny Tompoko?

Fiv: Nony nisasaka ny alina, dia nisy niantso hoe:

„Inty tamy ny Mpampakatra ka mitsangana re

Eny mandehana mitsena an'i Kristy, mandehana ka tsenao i Kristy!“

3 Nobanjiniko 'reo olo-manan-daza,

Nantenaiko fa ireo no haneho ny Tompoko.

Hay va re ka ny mahantra tsy mba tazana

No efa sitrany isehoana sy hotiaviko.

Fiv: Nony nisasaka ny alina, dia nisy niantso hoe:

„Inty tamy ny Mpampakatra ka mitsangana re

Eny mandehana mitsena an'i Kristy, mandehana ka tsenao i Kristy!“

4 Teo anivon'ireo mpianatra aho nikaroka

Nalahelo fa tsy tazako ny Tompoko

Kanjo raha nizara mofo niombom-bavaka

Nibaliaka ny hazavana notadiaviko!

Fiv: Nony nisasaka ny alina, dia nisy niantso hoe:

„Inty tamy ny Mpampakatra ka mitsangana re

Eny mandehana mitsena an'i Kristy, mandehana ka tsenao i Kristy!“

SALAMO 4

Ray ô, efa natsanganao ho zanaka tahaka ny Zanakao izahay, ka ho toy ny mpirahalahy mianala miaraka Aminy: Izy no tokinay ary izahay kosa ho tokiny.

Sas: Aoka tsy hatahotra ianareo, na dia vitsy aza ianareo,

fa sitraky ny Rainareo ê ny hanome ny fanjakany. (Lk 12,32)

Andininy:

Raha miantso aho, valio, Andriamanitro

Fa Ianao re no fahamarinako

Ary Ianao no namonjy amy sarotra

Koa iantrao ary henoy ny antsoantsoko.

Ianareo kosa ho'aho, dia maninona

No dia tia zava-poana sy fitaka?

He ny Tompo miahy ny olo-maminy

Rah'vao miantso Azy Tompo aho dia henony.

Mangovita atsaharo ny heloka,

Mandiniha eo am-pialana sasatra;

'Zay fanatitra mendrika atolotra

Ary dia itokio Andriamanitra.

Iza hoe no hampahita fiadanana?

Asehoy ny endrikao Andriamanitra.

Ny hafaliana nomenao, ry Tompoko,

Mihoatra ny azy amy taom-pamokarana.

Raha vao mandry aho matory am-piadanana

Fa Ianao ihany manko no tokiko.

Eny isaorako Ianao Andriamanitro

Zanakao no nitondra fiadanana.

Sas: Aoka tsy hatahotra ianareo, na dia vitsy aza ianareo,

fa sitraky ny Rainareo ê ny hanome ny fanjakany.

SALAMO 134 (133)

Ny Tompo, miandry antsika hatrany, hangata-bonjy Aminy sy hisaotra Azy, na andro na alina.

Sas: Tompo ô, ampianaro mivavaka izahay. (bis) (Lk 11,1)

Andininy:

Ianareo rehetra manompo ny Tompo, misaora ny Tompo.

Ianareo 'zay manompo ny Tompo amin'ny alina an-toerany Masina.

Asandrato ny tananareo ka misaora ny Tompo Tsitoha

Ary aoka izy anie hitso-drano anareo 'zay eto Siona.

Koa andeha re hidera ny Ray 'zay mitahy sy miambina antsika

Ary hisaotra ny Zanaka sy ny Fanahy 'Zay niantsoana antsika.

Sas: Tompo ô, ampianaro mivavaka izahay. (bis)

TENIN'ANDRIAMANITRA

A: Det 6,4-7:

Mihainoa, ry Israely: Ny Tompo Andriamanitsika no hany Tompo, koa tiavo ny Tompo Andriamanitrao amin'ny fonao manontolo, amin'ny fanahinao manontolo ary amin'ny herinao rehetra. Aoka ho voarakitra ao am-ponao izao teny andidiako anao izao. Alatsaho ao an-tsain'ny zanakao izany ary lazao azy na ao an'trano ianao na eny an-dalana, na mandry ianao na mifoha.

na: Iz 30,15 sy 18:

Izao no lazain'ny Tompo: Mibebaha ianareo ary miandrasa am-piadanana, matokia tanteraka fa izany no herinareo. Ho avy ny andro, ka hamindra fo aminareo ny Tompo. Eny sambatra izay manantena Azy!

B: Hb 4,9-11a - D: 1 Jn 1,5b-6 - E: 1 Jn 3,18-20.