Talata I Vavaka Hariva

ANTSA (I.)

Volamena tahaka am-bovoka Ianao, ry Kristy, tsy avalan’ny endrikao tsy hamiratra,

satria ny marina tsy mba maty.

Fiv: Dera sy laza anie ho Anao, Ry Tompo Mpandresy.

1 Andriamanitra Ianao, ry Jesoa,

Fa nietry ho tonga olombelona

Ka hoy izahay manao hoe:

Fiv: Dera sy laza anie ho Anao, Ry Tompo Mpandresy.

2 Nohelohina Ianao novonoina,

Fa nitsangana tamin’ny maty,

Ka hoy izahay manao hoe:

Fiv: Dera sy laza anie ho Anao, Ry Tompo Mpandresy.

3 Any an-danitra Ianao ry Jesoa

No mandefa ny Fanahy Masina,

Ka hoy izahay manao hoe:

Fiv: Dera sy laza anie ho Anao, Ry Tompo Mpandresy.

SALAMO (II.) 20 (19)

Raha mbola miteny ny vola ampiteneno, hoy ny sasany. Fa Andriamanitra

tsy andrin’ny sasany, ho andrintsika ve?

Sas: Afa-tsy ny Anaran’i Jesoa Tompo, dia tsy misy

Anaran-kafa ambanin’ny lanitra hahazoantsika famonjena! (Asa 4,12)

Andininy:

1 Hohenoin’ny Tompo anie ianao amin’ny andro fahoriana

Harovan’ny Anaran’ny Andriamanitr’i Jakôba!

2 Handefasany vonjy avy any an-toerana masina

sy hotohanany avy any Siôna!

3 Ny fanatitrao rehetra, hotsaroany,

ny sorona dorana ho teliny

4 izay irin’ny fo, hotanterahiny.

Izay rehetra kasaina, homeny!

5 Izahay hihoby ny fandresenao;

ny Anaran’ny Andriamanitsika no ho fanevany.

6 Eny, ny Tompo anie hahatontosa

ny vavakao rehetra!

7 Fantatro dieny izao fa ny Tompo

hanome fandresena ny Voahosony

8 hamaly azy avy any an-danitra toerany masina

amin’ny fandresen’ny Tanany mahery!

9 Kalesy ny an’ny sasany; soavaly ny an’ny hafa;

ny Anaran’ny Tompo Andriamanitray ny anay no herinay!

10 Ka ireny mirepirepy sy lavo;

izahay kosa marim-pijoro!

11 Tompo ô! Omeo fandresena ny mpanjaka!

Valio izahay amin’ny andro iantsoanay Anao!

Sas: Afa-tsy ny Anaran’i Jesoa Tompo, dia tsy misy

Anaran-kafa ambanin’ny lanitra hahazoantsika famonjena!

SALAMO (III.) 21 (20)

Nahoana no tsy ho azo antoka ny fandresen’i Kristy? Andriamanitra anie no Rainy ê!

Sas: Ray ô, misaotra Anao aho satria Ianao nihaino ahy. (Jn 11,41)

Andininy:

1 Tompo ô, ny mpanjaka mifaly amin’ny herinao

Sy miravo aoka izany amin’ny fandresenao.

2 Izay irin’ny fony omenao;

ny vavaky ny molony tsy lavinao.

3 Tsenainao tsodrano mahasambatra izy;

ny lohany asianao fehiloha volamena.

4 Ny fiainana angatahiny omenao:

dia andro mitandavana mandrakizay.

5 Lehibe ny voninahiny noho ny fandresenao:

fiandrianana sy laza no arakotrao azy.

6 Ataonao fitsodrano mandrakizay izy,

fenoinao hafaliana eo anoloanao.

7 Matoky ny Tompo ny mpanjaka,

sy tsy mandao ny hatsaram-pon’ilay Avo.

8 Ny tananao mahatratra ny fahavalony rehetra

ny havananao mahatratra ny mpankahala azy:

9 hataonao anaty memy mirehitra ireny

amin’ny andro hisehoanao.

10 Ny terak’ireny halànao amin’ny tany,

ny taranany ... amin’ny zanak’olombelona.

11 Nikasa hanisy ratsy Anao ireny.

nifofo nanao tetika: fa tsy nahomby.

12 Ka ataonao miamboho,

sy anenjananao tsipîka.

13 Misandrata, ry Tompo amin’ity herinao.

Izahay mihira sy miantsa ny fahefanao.

Sas: Ray ô, misaotra Anao aho satria Ianao nihaino ahy.

TONONKIRA (IV.) (Apok 4,11; 5,9.10.12)

Ombalahy mbamin’ny akoholahy no nataon’ny razantsika sorona, ary ondry no natolotry

ny razamben’i Krisry. Fa ny an’i Kristy kosa, tsy hafa fa ny tenany ihany.

Sas: An’ilay Zanak’ondrin’Andriamanitra anie

ny hery sy ny laza ary ny voninahitra.

Andininy:

1 Ry Tompo Andriamanitra mandrakizay e,

Ianao re no mendrika ny haja sy ny hery

F’Ianao no nahary ny zava-drehetra

Ka nisy izy ireny satria sitrakao.

2 Ianao re no mendrika haka ny Boky

Hamaha sy hanala ny tombo-kaseny

Fa noho ny Rà, fony Ianao novonoina

Nanjary voavonjy ho an’ny Tompo ‘zahay.

3 ‘Zahay samy hafa fiteny sy foko

Ny olon-drehetra eran-tany tontolo

Nantsoinao izahay hanjakan’Izy Tompo

Ho tonga mpisorona hanjaka amy tany.

4 Ilay Zanak’Ondry voavono ho faty

No tokana mendrika handray fahefana,

Handray ny harena ombam-pahendrena,

Ny haja, ny laza arahina saotra.

Sas: An’ilay Zanak’ondrin’Andriamanitra anie

ny hery sy ny laza ary ny voninahitra.

TENIN’ANDRIAMANITRA (V.) 1 Jn 3,1a-2

Endrey, ity ny halehiben’ny fitiavan’Andriamanitra Ray antsika amin’ny iantsoana

antsika hoe zanany, sady tena zanany tokoa isika! Ry malala, zanak’Andriamanitra

isika ankehitriny nefa mbola tsy naseho izay ho tena toetrantsika; fa amin’ny andro

hampisehoana izany, dia fantatsika fa hanahaka azy isika, satria hahita azy araka

ny tena toetrany.

VALINKIRA (VI.) Salamo 135(134),6

Fiv: Ao aminao ny loharanon’aina,

ny hazavanao no hahitanay hazavana.

1 Ry Tompo, mba mahasoa ny fitiavanao.

Fiv: Ao aminao ny loharanon’aina,

ny hazavanao no hahitanay hazavana.

2 Voninahitra anie ho an’ny Ray sy ny Zanaka,

Voninahitra anie ho an’ny Fanahy Masina.

Fiv: Ao aminao ny loharanon’aina,

ny hazavanao no hahitanay hazavana.

TONONKIRAN’I MARIA (VII.)

Sas: Lehibe ny Tompo ka derao, ry fanahiko, derao!

Lehibe sy avo indrindra ny Tompo!

Andininy:

1 Ny foko midera ny Tompontsika

Ny saiko mifaly amin’Andriamanitra

Noho Izy Mpamonjy nitsinjo ahy

‘Lay mpanompovaviny tsinontsinona.

2 Fa indro manomboka ankehitriny

Hantsoin’ny taranaka: "Sambatra" aho.

Nahavita be tamiko ilay Mahefa

Ilay hoe: "Ny Masina no Anarany".

3 ‘Lay mandrakizay ny indrafony

Am’ny olon-drehetra matahotra Azy,

‘Lay Tompo Mpandresy mahery sandry

Mampihahaka ireo ‘zay mpiavonavona.

4 Manongana ireo izay mpanjakazaka,

Kanefa manadratra ireo ambany;

Manototra soa an’ireo noana

Fa mampody maina an’ireo mpanana.

5 Mpanarina an’Israely olony

Satria mahatsiaro ny indrafony

Nampanantenainy ny Razantsika

Ho an’i Abrahama sy izay taranany.

6 ‘Lay Ray be fitiavana mba derao,

Hobio ‘lay Zanany tonga nofo,

Ar’ koa ‘lay Fanahy Mampiray antsika

Ho mandrakizay alaovalo!

Sas: Lehibe ny Tompo ka derao, ry fanahiko, derao!

Lehibe sy avo indrindra ny Tompo!