Miaraka sy mihavana amintsika mandrakariva i Kristy.
FANAINGANA (I.) Sal na 100(99) na 67(66) na 95(94) na 24(23) [voafidy]
Hoy i Kristy: "na firy na firy, mivory amin’ny Anarako, dia eo afovoan’izy ireo aho”.
Fiv: Tongava, tongava anoloan’ny Tompo amin-karavoana
1 Ny tany, ny hareny: Azy Tompo avokoa
Dia izao rehetra izao ary izay monina ao.
2 Naoriny ambonin’ny rano izy ireny,
Napetrany tsara eo ambonin’ny ony;
Fiv: Tongava, tongava anoloan’ny Tompo amin-karavoana
3 Koa zovy no hiakatra hihaona amy Tompo;
Hanorim-ponenana an-toerany masina?
4 Ny olon-tsy meloka, ny olo-mahitsy,
‘izay tsy mianiana tsy to amin’ny hafa;
Fiv: Tongava, tongava anoloan’ny Tompo amin-karavoana
5 Dia Izy no hany hotsofina rano,
Ny Tompo Mpamonjy hanome rariny azy.
6 Fa izy no dimbin’ireo izay nizaha
Ny endrik’ilay Andriamanitra Tompo.
Fiv: Tongava, tongava anoloan’ny Tompo amin-karavoana
7 ‘Nareo vavahady, atrakao ny tatao,
‘Nareo varavarana re, misondrota!
8 Satria hiditra eo ny Mpanjaka malaza!
Fa iza ary moa no Mpanjaka malaza?
Fiv: Tongava, tongava anoloan’ny Tompo amin-karavoana
9 Ny Tompo mahery ny Tompo tsitoha,
Ny Tompon’ny tafika mahery an’ady!
10 ‘Nareo vavahady: atrakao ny tatao,
‘Nareo varavarana re, misondrota:
Fiv: Tongava, tongava anoloan’ny Tompo amin-karavoana
11 Satria hiditra eo ny Mpanjaka malaza!
Fa iza tokoa no Mpanjaka malaza?
12 Ny Tompon’ny tafika mahery an’ady,
Ny Tompo no hany Mpanjaka malaza?
Fiv: Tongava, tongava anoloan’ny Tompo amin-karavoana
13 Andeha ary hiara-midera ny Tompo!
Ny Ray: hanome voninahitra antsika;
14 Ny Zanaka: santatra, niantsoana antsika;
Fanahiny: nanamarinana antsika!
Fiv: Tongava, tongava anoloan’ny Tompo amin-karavoana
ANTSA (II.)
Isika foana no te-hamoy fo sy ho be siasia, fa ny Tompo rsy mivadika
na oviana na oviana amin’ny fanekeny.
1 Ianao ilay nanokana vahoaka
Sy nanolotra ny Tananao taminy
Moa tsy najoronao izy va
Ho hazavan’ny firenena eto an-tany?
Fiv: Mba tsarovy hatrany, Tompo ô, ny Rà, fanekena vaovao!
2 Notsahivinao sy nianiananao
Io fanekena io hatrany hatrany
Ireo biby notsitsihin’i Abrahama
Nodoran’ny afonao mba ho fanamby.
Fiv: Mba tsarovy hatrany, Tompo ô, ny Rà, fanekena vaovao!
3 Manadino ny naterany va re
‘Zany reny tsy hangoraka ny zanany?
Eny, na dia manadino aza izy
Ianao, Tompo ô, tsy manadino!
Fiv: Mba tsarovy hatrany, Tompo ô, ny Rà, fanekena vaovao!
4 Hotsaroanao ny Ràn’ny Zanakao
‘Zay natolotra hanafaka ny ota
F’izahay vahoakanao navotan-dafo
Miantsoantso sy maniry Anao, ry Ray.
Fiv: Mba tsarovy hatrany, Tompo ô, ny Rà, fanekena vaovao!
5 Ary sarin’io fanekena io
Mampiray Anao amin’ny vahoakanao:
Ny fitiavana mamehy ny mpivady
Eo ambany masonay lalandava.
Fiv: Mba tsarovy hatrany, Tompo ô, ny Rà, fanekena vaovao!
SALAMO (III.) 57(56)
Lazao ny Ray ny fiainanao, fa raha mpifankatia tsy miresaka,
very ny androatokom-pihavanana.
Sas: Fantatry ny Ray izay ilainareo
fa tia anareo ny Ray. (Mt 6,32; Jn 16,27)
Andininy:
1 Iantrao aho, ry Andriamanitra, iantrao!
Ianao no ifefen’ny fanahiko!
2 ny aloky ny elatrao no ifefeko
mandra-pifidin’ny loza!
3 Izaho miantso an’Andriamanitra Avo Indrindra
Ilay Mpamaly ny ratsy atao ahy.
4 Izy maniraka avy any an-danitra,
ka mamonjy ahy amin’ny tanan’ny mpanosy!
5 Izaho mandry afovoan-diona,
mpandripaka ny zanak’olombelona:
6 ny nifiny, lefona aman-jana-tsipîka
ny lelany, sabatra voaranitra!
7 Misandrata, ry Andriamanitra, any ambonin’ny lanitra!
Eran’ny tany tontolo ny voninahitrao!
8 Amelarany harato ny diako
ihadiany longoa eo anoloako!
9 Mitombina ny foko, ry Andriamanitra:
ka mihira sy miantso aho!
10 Foha, ry aiko, foha, ry jejy sy valiha!
Izaho mifoha maraina koa;
11 fa hidera Anao vory vahoaka, ry Tompo!
hiantsa Anao anivom-pirenena!
12 Fa lehibe hatrany an-danitra ny hatsaram-ponao.
Mahatakatra ny rahona ny fahamarinanao!
13 Misandrata, ry Andriamanitra, any ambonin’ny lanitra!
Eran’ny tany tontolo ny voninahitrao!
Sas: Fantatry ny Ray izay ilainareo
fa tia anareo ny Ray.
TONONKIRA (IV.) Jer 31,10-14
I Kristy no vovonana iadian’ny lohany, hiraisan’ireo rehetra mino Azy.
Nefa indrisy, he ireto fitsitokotokoantsika!
Sas: Hitondra azy ilay Zanak’ondry ka hitarika azy an- doharano velona.
Dia ho andian’ondry tokana ihany sy ho mpiandry tokana. (Jn 10,16; Apok 7,17)
Andininy:
1 Henoy, ry firenena, ny tenin’ny Tompo:
ampandreneso ny nosy any lavitra!
2 Ilay nampiely an’Israely dia hanangona,
ary ho toy ny mpiandry miambina ny ondriny.
3 Eny, ny Tompo hanafaka an’i Jakôba,
sy hanavotra azy amin’ny tanan’ny mahery noho izy:
4 ka ho avy amina hobin-kafaliana izy ireo:
eny amin’ny havoan’i Siôna,
5 hankafý ny zava-tsoan’ny Tompo: ny vary sy ny divay,
diloilo, zanak’omby aman’ondry!
6 Ny fanahiny ho toy ny saha vonton-drano;
izy ireo tsy harisarisa intsony.
7 Amin’izay ny tovovavy dia hifaly amin-dihy;
ny tovolahy, ny zokiolona koa dia hitavana.
8 Ny fisaonany hampodiko ho haravoana;
hafaliana no hatambiko ny fahoriany!
9 Ny fanahin’ny mpisorony hovokisako zavematavy;
ny oloko hetsahiko amin’ny zava-tsoako!
Sas: Hitondra azy ilay Zanak’ondry ka hitarika azy an- doharano velona.
Dia ho andian’ondry tokana ihany sy ho mpiandry tokana.
SALAMO (V.) 48(47)
Hazo avo ny Fiangonan’i Kristy. tsara firobona ka halan-javatra. Kanefa Vatolampy
ampy handihizam-baratra Izy, ka uy hihontsona na oviana na oviana.
Sas: Vatolampy no nanorenan’i Kristy ny Fiangonany
ka tsy hahery noho izy ny Fanjakan’ny Fahafatesana. (Mt 16.18)
1 Ny Tompo lehibe sy mendridera indrindra
Ao amin’ny tanànan’Andriamanitsika.
2 Ny vohiny masina, tsara fideza
fifalian’ny tany tontolo.
3 Ny vohitra Siôna, any am-parany avaratra,
tanànan’ny mpanjaka lehibe.
4 Andriamanitra amin’ireo tilikambony
mitomban-ko fiarovana avo.
5 Nefa indreny mpanjaka mivorivory
dia miara-mandroso.
6 Kanjo he: mahatazana ka talanjona,
mangorohoro dia riatra mandositra!
7 Nihovotrovotra foana teo,
nihararetra toa mpivelona;
8 toa azon-drivotra atsinanana
irony mahapotika sambon-dranomasina!
9 Araka ny henonay no mbola hitanay
ao an-tanànan’ny Tompon’ny Tafika,
10 ao an-tanànan’ny Andriamanitray!
Andriamanitra anie hampijoro azy mandrakizay!
11 Izahay, ry Andriamanitra, mametso ny hatsaram-ponao
ao anivon’ny Tempolinao.
12 Ny voninahitrao dia toy ny lanitrao
mitatao ny tany tontolo!
13 Ny tananao feno fahamarinana
ary noho ny fitsaranao,
14 mifaly ny vohitra Siôna,
mibitaka ny zanakavavin’i Jodà!
15 Hodidinonareo i Siôna; isangodino!
isao ny tilikambony;
16 banjino tsara ny mandany
diniho fatratra ny lapany:
17 mba hahazoanareo mitantara
amin’ny taranaka any aoriana
18 fa Andriamanitra Andriamanitsika
no mitantana antsika mandrakizay!
Sas: Vatolampy no nanorenan’i Kristy ny Fiangonany
ka tsy hahery noho izy ny Fanjakan’ny Fahafatesana.
TENIN’ANDRIAMANITRA (VII.) Izaia 66,1-2
Izao no lazain’ny Tompo: Ny lanitra no seza fiandrianako ary ny tany no
fitoeran-tongotro. Ka trano inona no hataonareo ho ahy? ary fitoerana manao
ahoana no ho fitsaharako? Izao rehetra izao nataon’ny tanako avokoa; ka izany
no nahatonga azy ho misy - teny marin’ny Tompo. - Izao no olona tsinjoviko,
dia izay manetry tena sy torotoro fo, ary mangovitra amin’ny teniko.
VALINKIRA (VII.) (Sal 25,11-12)
Fiv: Avoty aho, ry Tompo ô, iantrao. (indroa)
1 Mizotra amy lala-mahitsy,
Amy lala-mahitsy ny tongotro.
Fiv: Avoty aho, ry Tompo ô, iantrao. (indroa)
2 Voninahitra anie ho an’ny Ray,
Ho an’ny Zanaka sy ny Fanahy.
Fiv: Avoty aho, ry Tompo ô, iantrao. (indroa)
TONONKIRAN’I ZAKARIA (VIII.)
Mino an ‘i Kristy isika? - Tanisao kely ange ireo haren-tsarobidy natobany amintsika ê!
Sas: Ny masoko nahita ny famonjena avy aminao,
ry Andriamanitro! (Lk 2.30)
Andininy:
1 Deraina isaorana Izy Tompo
Ny Tompo Andriamanitr’Israely
Fa Izy efa tonga namangy antsika
Nanavotra antsika amy fahavalo.
2 Nanolotra antsika herim-pamonjena
Avy amin’ny fianakaviana iray
Dia ny an’i Davida mpanompo tiany
F’izany tokoa no efa nolazainy.
3 Fa Teniny nentin’ny Mpaminany
Dia ireo olomasiny fahagola:
Ny vonjiny hanala amy fahavalo
Hanafaka antsika amy mpankahala.
4 Noho izy nandala ny Razantsika,
Dia indro tsaroany ny Fanekeny
Fa teny nomeny an’i Abrahama
Ny hanafaka antsika amy fahavalo.
5 Am’zay ‘sika ho afa-manompo Azy
Tsy anatin’ny tahotra sy ahiahy
Fa entin’ ny fo tia sy mahatoky
Ho eo anatrehany lalandava.
6 Ianao ‘zao anaka, no antsoina:
Ho ‘lay "Mpaminanin’ny Avo indrindra",
Hizotra anoloan’ny Tompo Ianao
Hamboatra ny lalana ‘zay hombany.
7 Ianao hanambara ny famonjena
Dia ny famelana ny hadisoana
Satria Andriamanitra fo miantra
Mandefa masoandro hamangiany antsika.
8 Fanilo hanazava reo mitakiky
Anatin’ny haizina mahafaty.
Fanilo hanazava ny diantsika
Am’lalam-piadanana lavorary.
9 Isaory ny Ray nanome antsika
Ny Zanany ho masoandrom-pamonjena!
Hobio ny Fanahy niantsoana antsika
Ho sambatra hibanjina ny mazava.
Sas: Ny masoko nahita ny famonjena avy aminao, ry Andriamanitro!
RANOMBAVAKA (IX.)
Misakana antsika tsy hahita ny marina, ary tsy hanatanteraka azy matetika, ny
fitiavan-tenantsika; koa ‘ndeha isika hangataka amin’Andriamanitra Ray mba
hanafaka antsika amin’izany aretim-panahy izany, manao hoe:
Fiv: Arotsahy aminay ny fahazavanao sy ny fahamarinanao.
1 Be indrafo Ianao, ry Andriamanitra nahary anay sy nanavotra anay tao amin’ny
Zanakao; koa tantano ny fanirianay sy ny asanay anio.
Fiv: Arotsahy aminay ny fahazavanao sy ny fahamarinanao.
2 Ataovy mandefitra amin’ny olona rehetra izahay, fa efa nandeferanao sy
namindranao fo.
Fiv: Arotsahy aminay ny fahazavanao sy ny fahamarinanao.
3 Hamirapiratra aminay anie ny fahazavanao anio tontolo hanilo ny lalana
hitondranay ny fiainanay.
Fiv: Arotsahy aminay ny fahazavanao sy ny fahamarinanao.
4 Ny fiadananao anie hiaro ny fonay sy ny sainay hifantohany amin’ny marina
sy hikatsahany ny hitsiny.
Fiv: Arotsahy aminay ny fahazavanao sy ny fahamarinanao.
5 Fangatahana hafa
Fiv: Arotsahy aminay ny fahazavanao sy ny fahamarinanao.
Rainay any andanitra ...
Ry Andriamanitra mahefa ny zavatra rehetra sy mandrakizay, fahazavana
fototry ny fahazavana rehetra Ianao ary andro tsy manam-pahataperana;
koa dieny izao maraina izao, mivavaka Aminao izahay enga anie hampamiratra
ny fonay ny hazavanao manodidina anay dia hisava ny haizina vokatry ny
fahotana. Amin’ny alalan’i Jesoa Kristy Zanakao Tomponay...
TSODRANO (X.) [ohatra]
Mpitsodrano:
Ilay nahary ny ranomasina noho ny sitrapony ihany,
Ilay nampitony ny rivo-doza tamin’ny Teniny tokana,
ary Ilay rivotra mitsoka malefaka anie
hampitody antsika any amin’ilay Seranana.
Valiny:
Misaotra e! Fa sitrak’Andriamanitra ny hahavonjy antsika!