Alakamisy I Vavaka Hariva

ANTSA (I.)

Na Tompo aza i Kristy, dia nanasa ny tongotry ny mpianany satria izay tia mahefa.

Fiv: Izay anjakan’ny fitiavana, anjakan’Andriamanitra.

1 Ny fitiavana an’i Kristy no manambatra antsika ho iray:

Aoka ary hientan-karavoana hifaly ao aminy.

2 Hajao sy tiavo ‘lay Andriamanitra velona

Ny fifankatiavana enga anie hanjaka tokoa

3 Satria ‘fa mitambatra sy mivondrona ho ‘ray isika

Tandremo sao very indray ‘zao firaisampontsika ‘zao

4 Ny ady, ny fifandirana, aoka re atsaharo

Kristy Andriamanitra enga anie hanjaka amintsika.

5 Enga anie izahay rehetra mba hiaraka hahita Anao

Toy ny olompinidinao re, ry Tompo Andriamanitra.

6 Dia hiara-ko sambatra ao amin’ny Fanahy Masina

Atambatr’ilay fatoram’piadanana antenainay.

7 Haravoana tsy hita lany tsy hisy hanala aminay

No lova miandry anay h’o an’ny taona mandrakizay.

SALAMO (II.) 30(29)

Ny ranomaso mody tsiky raha i Kristy no miaraka amintsika;

ny fijaliana aza famonjena, zary rano mody aina.

Sas: Mientan-kafaliana aho eo anivon’ny fahorian-drehetra,

noho i Kristy. (2 Kor 7.4)

Andininy:

1 Izaho midera ny Tompo izay nanafaka ahy:

Tsy navelanao hifalian’ny fahavaloko aho.

2 Ry Tompo Andriamanitra ô,

niantso Anao aho, ka nositraninao!

3 Ny fanahiko, ry Tompo ô,

nankarinao avy any an-tSeoly

4 novelominao aho

izay efa nitsitra tany an-davaka.

5 Antsao ny Tompo, ianareo mpivavaka!

Isaory ny anarany masina.

6 Mihelina foana ny havinirany,

maharitra kosa ny fanambinany.

7 Izaho: hariva, mialin-tomany;

maraina, velon-kalo!

8 Hoy ny teniko raha mbola niadana:

Tsy hihontsona mandrakizay aho!

9 Satria mantsy nambinin’ny Tompo

sy nataony toy ny vohitra mafy.

10 Kanjo, nanafenanao Tava:

ka indro nirepirepy!

11 Dia mbola Ianao, ry Tompo, no nantsoiko,

ny Tompo no nihantako.

12 Soa inona no avy amin’ny ràko

sy ny idinako any an-davaka?

13 Ny vovoka moa midera Anao

na manambara ny fahamarinanao!

14 Mandrenesa, ry Tompo, iantrao aho!

Tompo ô, tahio aho!

15 Dia navadikao ho dihy ny toreoko,

natosakao ny lasakako:

16 hafaliana no nasikinao ahy,

mba tsy hangina ny foko fa hiantsa Anao!

17 Ry Tompo Andriamanitra ô,

mandrakizay no isaorako Anao!

Sas: Mientan-kafaliana aho eo anivon’ny

fahorian-drehetra, noho i Kristy.

SALAMO (III.) 32(31)

Tsy misy mahira kilema momba ny tena. fa ny heloka ibabohana mody rariny.

Sas: Izaho koa tsy manameloka anao, mandehana,

aza manota intsony amin’ny ho avy. (Jn 8,11)

Andininy:

1 Sambatra izay afa-keloka sy voavela ota,

Eny, sambatra ny olona

tsy itanan’ny Tompo hadisoana

sy tsy misy fitaka eo ambava.

2 Raha mangina aho, tankina ny heriko

noho ny sondrotr’aina sesitany.

fa notsindrian’ny Tananao andro aman’alina,

ka toy ny main’ny hainandro fahavaratra.

3 Koa nitsorako taminao ny otako

tsy nafeniko Anao ny hadisoako.

Miaiky heloka aho, Tompo! hoy aho,

dia nesorinao ny hadisoana sy ny ota.

4 Koa am in’ny andro fahoriana,

ny mpivavaka rehetra hidera Anao;

raha ho tondraka ny ranobe,

izy tsy mba ho trany.

5 Ianao no fiereko miaro amin’ny loza

izaho hodidininao hiram-pahafahana.

Ao ianao hanariko, hotoroako ny lalan-kaleha,

hotolorako saina, harahiko maso,

6 Aza manahaka ny soavaly sy mole tsy aman-tsaina

rohizam-bava sy vozona vao manatona.

Fahoriana maro ny an’ny ratsy fanahy,

fa izay matoky ny Tompo tototra hatsaram-po.

7 Mifalia ao amin’ny Tompo!

Miravoa, ry olomarina!

Mihobia avokoa,

ry mahitsy fo!

Sas: Izaho koa tsy manameloka anao, mandehana,

aza manota intsony amin’ny ho avy. (Jn 8,11)

TONONKIRA (IV.) Apok 11,17-18; 12,10-12

Sas: Nandray ny fanjakany Andriamanitra Tompo,

fa Izy no nanao izao tontolo izao.

Nandray ny fanjakany Andriamanitra Tompo,

fa Azy izao rehetra izao.

Andininy:

1 Ry Andriamanitray, misaotra Anao izahay

Ry Mahefa, ry Taloha sy ankehitriny,

Fa naneho ny herinao tokoa Ianao,

Ka nandray ny fanjakana hoentinao!

2 Nihotakotaka avokoa ny firenena

Fa nipoaka kosa ny hatezeranao

Eny tonga ny fotoana fitsarana

Hanomezam-balisoa ny nodimandry.

3 Ts’iza izany fa ny Mpaminaninao

‘Reo mpanomponao sy ny olomasinao

‘Reo matahotra ao am-po ny Anaranao

Ny madinika rehetra sy ny ambony.

4 Indro tonga ankehitriny ny fotoana

Ka miseho ny Famonjena sy ny Hery

‘Zao tokoa no Fanjakan’Ilay Tsitoha

‘Lay Voahosony efa ombana Fahefana.

5 Indro lavo ilay mpiampanga ny havanay

‘Lay nifofo tsy an-kijanona azy ireo

Noreseny tamy ran’ny Zanak’ondry

Tamy teny notazoniny ho fambara.

6 Izy manko tsy nandala loatra ny ainy

Na nikemo sy natahotra ho faty

O ry lanitra tontolo, mifalia

Mihobia, ry olomasina rehetra!

Sas: Nandray ny fanjakany Andriamanitra Tompo,

fa Izy no nanao izao tontolo izao.

Nandray ny fanjakany Andriamanitra Tompo,

fa Azy izao rehetra izao.

TENIN’ANDRIAMANITRA (V.) 2 Kor 10,17

Izay mirehareha, aoka hirehareha ao amin’ny Tompo. Satria tsy izay

midera tena no tena olona voazaha toetra, fa izay derain’ny Tompo.

VALINKIRA (VI.) Apok 5,9

Fiv: Navotanao izahay, ry Tompo, tamin’ny Rànao.

1 Avy amin’ny foko sy ny fiteny amam-pirenen-drehetra.

Fiv: Navotanao izahay, ry Tompo, tamin’ny Rànao.

2 Voninahitra anie ho an’ny Ray sy ny Zanaka sy Fanahy Masina.

Fiv: Navotanao izahay, ry Tompo, tamin’ny Rànao.

TONONKIRAN’I MARIA (VII.)

Iza tamintsika moa no nanampo, ny halalin’ny Fitiavan’Andriamanitra antsika?

Sas: Deraontsika tsy tapaka Andriamanitra

izay nanao zava-mahagaga ho antsika ao amin’i Kristy. (1 Kor 1,4-5; Asa 2,11)

Andininy:

1 Ny foko midera ny Tompontsika

Ny saiko mifaly amin’Andriamanitra

Noho Izy Mpamonjy nitsinjo ahy

‘Lay mpanompovaviny tsinontsinona.

2 Fa indro manomboka ankehitriny

Hantsoin’ny taranaka: "Sambatra" aho.

Nahavita be tamiko ilay Mahefa

Ilay hoe: "Ny Masina no Anarany".

3 ‘Lay mandrakizay ny indrafony

Am’ny olon-drehetra matahotra Azy,

‘Lay Tompo Mpandresy mahery sandry

Mampihahaka ireo ‘zay mpiavonavona.

4 Manongana ireo izay mpanjakazaka,

Kanefa manadratra ireo ambany;

Manototra soa an’ireo noana

Fa mampody maina an’ireo mpanana.

5 Mpanarina an’Israely olony

Satria mahatsiaro ny indrafony

Nampanantenainy ny Razantsika

Ho an’i Abrahama sy izay taranany.

6 ‘Lay Ray be fitiavana mba derao,

Hobio ‘lay Zanany tonga nofo,

Ar’ koa ‘lay Fanahy Mampiray antsika

Ho mandrakizay alaovalo!

Sas: Deraontsika tsy tapaka Andriamanitra

izay nanao zava-mahagaga ho antsika ao amin’i Kristy.