ANTSO (I.)
Inona no mbola mampisalasala antsika? Marina fa tsy hita ny zavatra ara-panahy,
kanefa eo ny Fanahy antoka ho antsika.
Fiv: Antoka ho antsika ny Fanahy. (2 Kor 1,22)
1 Mitaona antsika hibebaka tokoa,
Ka hihavana amy Ray.
Fiv: Antoka ho antsika ny Fanahy.
2 Miantso antsika ho amin’ny mazava
Hahafantatra ny Ray;
Fiv: Antoka ho antsika ny Fanahy.
3 Manafaka amin’ny tebitebin-tsaina
Ka hitodika amy Ray.
Fiv: Antoka ho antsika ny Fanahy.
4 Mibitsika eo anivon-java-maro
Izay sitraky ny Ray.
Fiv: Antoka ho antsika ny Fanahy.
5 Manoro antsika vavaka sahaza
Ankatoavin’Izy Ray.
Fiv: Antoka ho antsika ny Fanahy.
6 Manampy antsika hiaina dieny izao,
‘Lay fiainam-baovao. (Rom 8)
Fiv: Antoka ho antsika ny Fanahy.
FANAINGANA (II.) Salamo 113 (112)
Fiv: Avia ianareo nosoavin’ny Raiko, avia hisaotra Azy.
1 Derao ry mpanompon’ny Tompo
Derao ny Anaran’ny Tompo.
2 Tsarovy ny Anaran’ny Tompo
Na izao na ho mandra kizay.
Fiv: Avia ianareo nosoavin’ny Raiko, avia hisaotra Azy.
3 Tongava marain-tsy hariva
Hidera ny Anaran’ny Tompo, Aleloia!
4 Ambonin’ireo firenena:
Ny lazany avo dia avo!
Fiv: Avia ianareo nosoavin’ny Raiko, avia hisaotra Azy.
5 Moa misy mitovy amy Tompo?
Ny Tompo mitoetra any ambony,
6 Ka miondrika Izy mijery,
Na lanitra izany na tany.
Fiv: Avia ianareo nosoavin’ny Raiko, avia hisaotra Azy.
7 Alany amy fako ny ory,
Esoriny avy eo ny mahantra:
8 Apetrany anilan’andriana
Andriana izay tsy fanta-bahoaka
Fiv: Avia ianareo nosoavin’ny Raiko, avia hisaotra Azy.
9 Ny momba amponeniny an-trano:
Niteraka maro ka faly.
10 Andeha isika hisaotra ny Ray:
Natsangany ho velona isika,
Fiv: Avia ianareo nosoavin’ny Raiko, avia hisaotra Azy.
11 Hitovy amin-Janany tiany;
Nomeny Fanahy manan-kery
12 Hametraka antsika rehetra
Anilany mandrakizay.
Fiv: Avia ianareo nosoavin’ny Raiko, avia hisaotra Azy.
SALAMO (III.) 85 (84)
Inona no mbola mampisalasala antsika hoe: "tia antsika ve Andriamanitra,
nefa mbola mijaly foana isika?" Kanefa i Kristy mahafoy ny Ainy ho antsika ho antoka.
Sas: Izao no ahafantarantsika ny tena fitiavana, i Jesoa
Tompo nahafoy ny Ainy hanavotra antsika, i Jesoa Tompo. (1 Joany 3,16)
Andininy:
1 Tsimbino, ry Tompo, ity taninao,
Ny babon’i Jakôba re ampodio:
Esory ny helok’ireo olonao dia sarony ny otany.
2 Ianao aza tezitra intsony aminay
Ny fonao vinitra re aok’izay!
Ianao no Mpamonjy ka ento mba hody ‘zahay Andriamanitra.
3 Toneo ny hatezerana raha sitrakao,
Ho tezitra mandrakizay ve Ianao?
Ho vinitra lava mandritra ny taona rehetra hifanaraka?
4 Tsy hamelombelona anay va Ianao?
Mba satry tokoa hiravo aminao:
Ianao tsara fo misehoa mba ho vonjy, ry Tompo Andriamanitra!
5 Mba tiako tokoa ny handre Azy Tompo,
Mirary fiadanana ho an’ireo tiany,
Mirary fiadanana ho an’ireo olo-miandrandra ny tavany.
6 Akaiky ‘zay mino Azy Tompo ny vonjy,
Honenan’ny lazany ety amintsika
Koa indro mihaona tokoa ny indrafo sy ny fahamarinana.
7 Ny rariny ombam-piadanana hatrany
Ny hitsiny hita mitsiry amy tany
Mitsinjo avy eny amy rahon’ny lanitra kosa ny rariny.
8 Handrotsaka orana anie Izy Tompo
Izay hampamokatra tsara ny tany
Fa lalan-kizoran’ny Tompo ny rariny ombam-piadanana.
9 Endrey ny indrafon’Izy Ray amintsika
Navelany ota, nantsoiny ho mpandova
Hiadam-pinaritra tahaka ny Zanany hahita ny tavany.
Sas: Izao no ahafantarantsika ny tena fitiavana, i Jesoa
Tompo nahafoy ny Ainy hanavotra antsika, i Jesoa Tompo.
TONONKIRAN’ IZAIA (IV.)Iz 26,1-10.12
Masina ny fiangonana? Misy ny zavatra manafintohina,
kanefa antoka i Kristy sy ny Apostoly Vatofototra iorenany.
Sas: Vatofototra roambinifolo, dia ny Apostolin’ny Tompo,
no nanorenan’Andriamanitra ny mandan’ny tanàna,
dia ny Apostolin’ny Tompo. (Apok 21,14)
Andininy:
1 Fa manan-tanàna mimanda isika
Dia manda roa sosona miaro antsika
Vohay vavahady ilay firenena
Mitandro ny rariny lalandava.
2 Fa izy no miadana tsy manahy
Noho izy mitoky aminao, ry Tompo,
‘Nareo matokia azy Tompo hatrany
Ny Tompo tsy miova toa vatolampy.
3 Aetriny ireo naka toerana avo
Arodany koa ny tanàna ambony
Hitovy torosy amy vovotany
Ho fanosihosin’ireo mahantra.
4 Ny lalan’ny marina mandrirano
Ianao manko no efa mandravona azy
Ry Tompo mpitsara ô, tongava Ianao
Izahay dia matoky ny Anaranao.
5 Ny alina, manina Anao ny foko
Maraina, mikatsaka Anao ny saiko
Satria raha mitsara ny tany Ianao
Handresy ny fahamarinanao.
6 Avela ve ny heloky ny olon-dratsy?
Minia mankahala ny rariny izy?
Na monina anilan’ny marina aza,
Ny ratsy fanaony tsy miova akory.
7 Matoky ‘zahay zanakao, ry Ray,
Matoky izahay mandry fehizay,
Satria Zanakao no nirahinao
Hitondra fiadanana ho anay.
8 Dia Izy no fototra fehizoro,
Iorenan’ny manda sy ny tanàna;
‘Zahay vato velona tsy hikoro
Satria efa atambatry ny Fanahy.
Sas: Vatofototra roambinifolo, dia ny Apostolin’ny Tompo,
no nanorenan’Andriamanitra ny mandan’ny tanàna,
dia ny Apostolin’ny Tompo.
SALAMO (V.)67 (66)
Sas: Ianareo izay lavitra taloha
dia manjary akaiky izao ao amin’i Kristy. (Efez 2,13)
Andininy:
1 Hiantran’Andriamanitra anie isika hotsimbininy
Ka hataony mamiratra eo amintsika ny tavany!
2 Dia ho fantatry ny olona eran-tany ny herinao,
Ka hanerana ireo firenen-drehetra ny vonjinao!
3 Ny vahoaka rehetra enga anie hidera, Andriamanitra ô,
Ny vahoaka rehetra enga anie hidera ny Anaranao!
4 Aoka hifaly sy hiantsa ny firenena isan-tokony
Fa Ianao dia mitsara azy rehetra ireny ara-drariny.
5 Fa Ianao dia mitsara vahoaka araka ny hitsiny
Sy manjaka am’ireo firenen-drehetra isan-tokony.
6 Ny vahoaka rehetra enga anie hidera, Andriamanitra ô,
Ny vahoaka rehetra enga anie hidera ny Anaranao!
7 Fa ny tany volena tsy misy izay tsy mamokatra,
Andriamanitra manko Andriamanitsika: mitsimbina.
8 Enga anie ka hitsimbina antsika hatrany Andriamanitra,
Ka ho masina eran’ny vazan-tany ny Anarany!
9 Voninahitra anie ho an’ny Ray nandefa ny Zanany
‘Zay nomeny hanasoavany antsika noho ny Fitiavany!
Sas: Ianareo izay lavitra taloha
dia manjary akaiky izao ao amin’i Kristy.
TENIN’ANDRIAMANITRA (VI.)(2 Kor 12,13a.15-15)
Inona ary no mahalatsa-danja anareo noho ny fiangonana sasany eo: afa-tsy hoe noho
izaho tsy mba nety nanararaotra anareo angaha? Indro efa fanintelo anefa izao no
hankanesako aty aminareo, fa tsy mba izaho akory no hanararaotra anareo. Satria tsy ny
fanananareo no tadiaviko, fa ianareo mihitsy. Sady tsy ny zanaka rahateo no tokony hiary
ho an’ny ray aman-dreniny, fa ny ray aman-dreny no tokony hiary ho an’ny zanany. Koa
raha ny amiko, finaritra aho handany sy holaniana tantera ka aza ho anareo, ary na dia ho
arakaraka ny fitombon’ny fitiavako anareo aza no ho fihenan’ny fitiavanareo Ahy.
SETRINY (VII.)
1 Afaka olan-teny ‘zay manan-joky:
I Jesoa no Zoky Andriamanitray;
Sitraky ny Ray mba hisolo vava:
Hifona ho anay noho ny helokay!
2 Manan-jara ihany ‘zay velon-dray:
Mahery ny Ray Andriamanitray;
Manan-jo ‘zahay satria mpandova:
Nomeny anay ‘zao rehetra izao!
3 Sambatra tokoa ‘zay mifankatia:
Iray ny Fanahy Andriamanitray,
Fihavananay Zanaky ny Ray,
Ka mamy ny miaina ny fiainanay!
4 Velom-bolo kosa ny manan-dReny:
Fa Reny tokoa ny Fiangonanay,
Miaritra ny mafy fa mpivahiny:
Mitantana anay ho any an-tranon-dRay!
TONONKIRAN’I ZAKARIA (VIII.)
Miandry takalon’antoka ho sandan’ny finoana ve isika, sa ampy ho antsika
izay nambaran’ny Tompo sy ny Fiangonany?
Sas: Sambatr’ireo tsy nahita zavatra igagana
nefa mino an’ i Jesoa Tompo. (Jn 20,29)
Andininy:
1 Deraina isaorana Izy Tompo
Ny Tompo Andriamanitr’ Israely
Fa Izy efa tonga namangy antsika
Nanavotra antsika amy fahavalo.
2 Nanolotra antsika herim-pamonjena
Avy amin’ny fianakaviana iray
Dia ny an’i Davida mpanompo tiany
F’ izany tokoa no efa nolazainy.
3 Fa Teniny nentin’ny Mpaminany
Dia ireo olomasiny fahagola:
Ny vonjiny hanala amy fahavalo
Hanafaka antsika amy mpankahala.
4 Noho izy nandala ny Razantsika,
Dia indro tsaroany ny Fanekeny
Fa teny nomeny an’i Abrahama
Ny hanafaka antsika amy fahavalo.
5 Am’zay ‘sika ho afa-manompo Azy
Tsy anatin’ny tahotra sy ahiahy
Fa entin’ny fo tia sy mahatoky
Ho eo anatrehany lalandava.
6 Ianao ‘zao anaka, no antsoina:
Ho ‘lay "Mpaminanin’ny Avo indrindra",
Hizotra anoloan’ny Tompo Ianao
Hamboatra ny lalana ‘zay hombany.
7 Ianao hanambara ny famonjena
Dia ny famelana ny hadisoana
Satria Andriamanitra fo miantra
Mandefa masoandro hamangiany antsika.
8 Fanilo hanazava reo mitakiky
Anatin’ny haizina mahafaty.
Fanilo hanazava ny diantsika
Am’lalam-piadanana lavorary.
9 Isaory ny Ray nanome antsika
Ny Zanany ho masoandrom-pamonjena!
Hobio ny Fanahy niantsoana antsika
Ho sambatra hibanjina ny mazava.
Sas: Sambatr’ireo tsy nahita zavatra igagana
nefa mino an’ i Jesoa Tompo.
RANOMBAVAKA (IX.)
Mahery ny Fanahin’Andriamanitra, koa andeha hiara-miantso Azy mba hahafahantsika manatanteraka Aminy izay nanirahan’ny Ray antsika:
Fiv: Alofy izahay, ry Fanahy, mba ho tonga nofo amy fiainanay ny Tenin’ny Tompo.
1 Ry Fanahy Zanahary ô, fantatry ny Ray ny antsoantson’ireo ray aman-dreny maro anaka anefa tsy an’asa, mitrongy vao homana, noho ny tsy rariny, noho ny fanambakana ataon’ny hafa ... , alofy izahay hitondranay izay famonjena tandrify azy ireo, noho ny Tenin’ny Tompo!
Fiv: Alofy izahay, ry Fanahy, mba ho tonga nofo amy fiainanay ny Tenin’ny Tompo.
2 Ry Fanahy Zanahary ô, fantatry ny Ray ny fankahalana kobonin’ireo anaovana tsindry hazo lena, noho ny firazanana samihafa, noho ny volon-koditra tsy mitovy ..., alofy izahay hitondranay izay famonjena tandrify azy ireo, noho ny Tenin’ny Tompo.
Fiv: Alofy izahay, ry Fanahy, mba ho tonga nofo amy fiainanay ny Tenin’ny Tompo.
3 Ry Fanahy Zanahary ô, fantatry ny Ray ny famoizam-po mandrendrika ireo rehetra toa niangaran’ny vintana: ny marary, ny an-tranomaizina, ny singan’olona diso fitiavana ..., alofy izahay hitondranay izay famonjena tandrify azy ireo, noho ny Tenin’ny Tompo!
Fiv: Alofy izahay, ry Fanahy, mba ho tonga nofo amy fiainanay ny Tenin’ny Tompo.
4 Fangatahana hafa
- ho an’ireo andevozin’ny fitiavan-tenany;
- ho an’ireo manampatra ny fahefana na ny hery ananany;
- ho an’ireo mpanjakazaka an-tanin’olona;
- ho an’ny kristianina tsy mivelona araka ny Tenin’ny Tompo!
Fiv: Alofy izahay, ry Fanahy, mba ho tonga nofo amy fiainanay ny Tenin’ny Tompo.
Rainay any an-danitra ...
Andriamanitra Fanahy ô, aza mandao anay, fa efa sitraky ny Ray nomena anay Ianao, koa ampio hahay mivavaka izahay, ary tohano hahatanteraka ny teny napetraky ny Tompo taminay, dia ho zanaka malala ankahasitrahan’ny Ray izahay! Amin’ny alalan’i Kristy Tomponay no angatahanay izany!
TSODRANO (X.)
Mpitsodrano:
Ilay Ray Vatolampy tsy mba miova,
ny Zanaka izay nitondra ny Tenin’Izy Ray,
ary ny Fanahy Masina ilay "Tombokaseny" anie
hanamafy orina antsika amin’ny finoana.
Valiny:
Misaotra e! Fa sitrak’Andriamanitra ny hahavonjy antsika!