FANAINGANA (I.)
Herinandro iray no lasa, mbola velon’aina isika ka afaka mibanjina ... ny voninahitry ny Tompo!
Fiv: (Avia mba hihoby), avia mba hihoby ny Tompontsika,
(Hobio Andriamanitra,) hobio ny Andriamanintsika
(Ilay Vatolampy ô,) Ilay Vatolampy namonjy antsika.
1 Hobio Izy Tompo, ry tany tontolo
Ka fo falifaly anompoana ny Tompo.
2 Tongava eo Aminy mihira miravo;
Ekeo fa ny Tompo no Andriamanitra!
Fiv: (Avia mba hihoby), avia mba hihoby ny Tompontsika,
(Hobio Andriamanitra,) hobio ny Andriamanintsika
(Ilay Vatolampy ô,) Ilay Vatolampy namonjy antsika.
3 Fa Azy isika satria noariny
Sy tena vahoakany, ondry fiandriny,
4 Ireo vavahadiny idiro amin-tsaotra,
Ny ao an-kianjany idiro amin-dera,
Fiv: (Avia mba hihoby), avia mba hihoby ny Tompontsika,
(Hobio Andriamanitra,) hobio ny Andriamanintsika
(Ilay Vatolampy ô,) Ilay Vatolampy namonjy antsika.
5 Derao Izy Tompo, ny Anarany isaory.
Miaiky isika fa tsara ny Tompo,
6 Fa mandrakizay ny fitiavany antsika,
Am’taona rehetra ny fahamarinany.
Fiv: (Avia mba hihoby), avia mba hihoby ny Tompontsika,
(Hobio Andriamanitra,) hobio ny Andriamanintsika
(Ilay Vatolampy ô,) Ilay Vatolampy namonjy antsika.
7 Andeha isika hiara-mitsaoka ny Tompo,
Hihoby ‘Lay Zanany ombam-pahefana,
8 Derao ny Fanahy manamasina antsika,
Manentana antsika hihoby ny Tompo,
Fiv: (Avia mba hihoby), avia mba hihoby ny Tompontsika,
(Hobio Andriamanitra,) hobio ny Andriamanintsika
(Ilay Vatolampy ô,) Ilay Vatolampy namonjy antsika.
ANTSA (II.)
Mpanjaka i Kristy, tsy amin’ny laza amam-boninahifra, fa hafa ny Azy no hanjakany.
Fiv: Tsy tandapa sesehena nankalaza
na vahoaka an’alinkisa no nihoby sy nitsena,
fa fanginana hatrany!
1 Tranon’omby mamanala
No mba lapa nofidiny
Mpiandry ondry:
‘Reo no tonga hanotrona Azy.
Fiv: Tsy tandapa sesehena nankalaza
na vahoaka an’alinkisa no nihoby sy nitsena,
fa fanginana hatrany!
2 Notadiavin’ny vahoaka
Ho mpanjaka an-tany Izy
Fa niery
Hafa ny azy no hanjakany!
Fiv: Tsy tandapa sesehena nankalaza
na vahoaka an’alinkisa no nihoby sy nitsena,
fa fanginana hatrany!
3 ‘Zao no didiny tsy lefy
Ny ho tia ‘reo fahavalo
Ary isika
Hiezaka mba hifankatia.
Fiv: Tsy tandapa sesehena nankalaza
na vahoaka an’alinkisa no nihoby sy nitsena,
fa fanginana hatrany!
4 Ary ny hazo fijaliana
Nanehoany ny fitiavany
‘Sika kosa
Dia antsoiny hanaraka Azy.
Fiv: Tsy tandapa sesehena nankalaza
na vahoaka an’alinkisa no nihoby sy nitsena,
fa fanginana hatrany!
5 Ary ho setrin’izany
Dia nasandratry ny Rainy
Ka nomeny
‘Lay Anaram-boninahitra
Fiv: Tsy tandapa sesehena nankalaza
na vahoaka an’alinkisa no nihoby sy nitsena,
fa fanginana hatrany!
6 Amin’ny andro farany any
Dia hiseho hamiratr’Izy
Ka hiantso
‘Reo handova ny fanjakany.
Fiv: Tsy tandapa sesehena nankalaza
na vahoaka an’alinkisa no nihoby sy nitsena,
fa fanginana hatrany!
SALAMO (III.) 92 (91)
Fantatry ny Tompo izay ataony: reharehantsika izany!
Sas: Ny voa nafafy e tsy maintsy maty e
Mba hamokarany zato heny. (Jn 12,24)
Andininy:
1 Tsara ny misaotra Anao, ry Tompo,
Miantsa ny Anaran’ny Avo Indrindra;
Ny hatsaram-ponao raha vao maraina,
Ny fahamarinana nony alina.
2 Dia am’tory folo sy valiha
Ravahan-kalokalo sy lokanga
Ka faly aho mahita ny asanao
Sy ravo noho ny vitan-tananao.
3 Akory fa lehibe ny vitanao
Mba lalina rah’ny fisainanao
Ny tsy ampy saina no tsy mahalala
Adala foana ireo tsy mahatsapa.
4 Mahomby sady faly ve ny ratsy
Dia rariny avokoa ve ‘zay ataony?
Tsy ho ela dia ho ringana izy ireny
Ianao manko Tompo tena Avo.
5 ‘Reo fahavalonao jereo fa toro!
Mihahaka avokoa ny olon-dratsy
F’izaho nihanatanjaka aoka izany
Satria voahosotrao ka manan-kery.
6 Bandriniko tokoa ny fahavalo
Ary henoko avokoa ny teti-dratsy
Ny marina maniry toa antrendry
Dia tahaka ny sederan’i Libana.
7 Maniry ao an-tranon’Izy Tompo
Dia ao an-kianjan’ny Andriamanitsika
Hamokatra na dia efa antitra aza
Misondrotra tokoa ny tsiron-kazo.
8 Izany dia mitory fa mahitsy
Ny Tompo Vatolampy tsy mikoro
Ny Rariny misoritra ho Lalàny
Ny Hitsiny tokana tandroiny.
9 Fa tsara ny misaotra Anao, ry Ray,
Ny Zanaka ‘zay Loharanon’aina,
Fa tsara koa ny miara-mankalaza
Mihoby anao Fanahy ‘zay mankahery.
Sas: Ny voa nafafy e tsy maintsy maty e
Mba hamokarany zato heny.
TONONKIRAN’I MOIZY (IV.) Dt 32,1-12
Ny Tena fitiavana marina dia fitiavana tsy terena ary maimaim-poana.
Sas: Fa toy izao no fitiavan’Andriamanitra:
Izy no tia antsika mialoha. (1 Jn 4,10)
Andininy:
1 Henoy, fa hivolana Aho, ry Lanitra!
Ry tany, mandrenesa izany teniko.
Hirotsaka toa erika ny anatro
Hilatsaka toa ando anie ny teniko!
2 Toa orana tandrify zava-maitso
Toa rano manakotsa vondron’ahitra
Anaran’Izy Tompo no antsoiko ...
Hobio ny fiandrianan’Andriamanitra!
3 Fa Izy vatolampy: soa ny asany,
He rariny ‘zay lalana soritany;
Ny Tompo mahatoky tsisy hosoka:
Ary hitsiny sy marina tanteraka.
4 Nivadika izy ireo nandao ny marina,
Taranaka fangoloka, mpamitaka!
Izany ve no ataonareo ny Tompo?
Ry olona tsy hendry tsy mandinika!
5 Tsy Izy va no Ray nahary anao,
Nanampy anao hijoro ho marim-pototra?
Tsarovy irony andro fahagola re;
Todiho ireny taona nifanaraka.
6 Resaho ny rainareo fa hatorony,
Resaho koa ny Ntaolo fa hambarany.
‘Lay Avo raha nanao ny firenena:
Nizara ny taranak’olombelona,
7 Nametra ny vahoaka isan-tokony,
Manaraka ny fokon’Israely,
Ny lova ho Azy Tompo dia ny olony,
I Jakôba nofidiny ho anjara lovany.
8 Fa tany an’efitra izy no natsangany,
Dia efitra mangina nijaliany.
Ka indro nambombany, notandremany,
Narovany toy ny anakandriamasony.
9 Toa vorona mahery miahy ny akaniny:
Manidina manaloka ny zanany,
Velariny ny elany ho an-janany,
Velariny hipetrahany eo amboniny.
10 Ny Tompo no hany afaka mitsimbina,
Tsy manana andriamani-kafa ny olony.
Isaory ‘zay nataony tamintsika re.
Isika hiombon-dova amin-Janany.
Sas: Fa toy izao no fitiavan’Andriamanitra:
Izy no tia antsika mialoha.
SALAMO (V.) 8
Nataon’Andriamanitra ho antsika olombelona bitika izao rehetra izao.
Fitiavana izany, ... Fa isika rehetra kosa an’i Kristy.
Sas: Nataon’Andriamanitra eo am-pelatanan’i Kristy
ny zavatra rehetra, ary Izy no natsangany ho Tompony. (Efez 1,22)
Andininy:
1 Inty aho hihira ny fiandriananao
Ambony sy madera manoatra noho ny lanitra
Ireo vao minono sy ireo zazabodo
No he miantsa Anao ka mitory fideràna.
2 Dia sina sy nangina ‘reo fahavalonao!
Ka moana ny mpisompatra, menatra ny rafy
Rah’ hitako ny lanitra nataon’ny tananao
Ny volana, ny kintana ‘zay namboarinao.
3 Fa inona ny olona no mba tsiahivinao
Ny zanak’olombelona he tsimbininao
Fa lasa ambany kely noh’Andriamanitra izy
Ka henim-boninahitra izy nasondrotrao.
4 Ny asan-tananao foinao ho zakainy
Ny zavatra rehetra eo ambany fiadidiany.
Dia omby aman’ondry omban’ny bibidia,
Ny biby izay mandady sy mandia izany tany.
5 Ny vorona eny an-danitra sy trondron-dranomasina
Izay miriaria sy mifaly eny ambony onja.
Ry Tompo Andriamanitra endrey ny Anaranao
Marevaka sy fantatry ny mponina eran-tany.
6 Deraina sy hobina ‘Lay Ray Nahary antsika,
Ny Zanaka Mpamonjy natsangany ho Tompo,
Deraina ka hobina ny Fanahy nomeny antsika
Ho antoka hampiray ny zavatra rehetra.
Sas: Nataon’Andriamanitra eo am-pelatanan’i Kristy
ny zavatra rehetra, ary Izy no natsangany ho Tompony.
TENIN’ANDRIAMANITRA (VI.) (Rom 12,18,20a.21)
Raha azonareo atao ka miankina aminareo koa, dia mihavana amin’ny olona rehetra.
Omeo hanina ny fahavalonareo raha noana, omeo hosotroina izy raha mangetaheta ...
Aza kivy aza ketraka amin’ny ratsy fa milozoha amin’ny tsara dia ho resinareo izy.
VALINKIRA (VII.)
Fiv: Ho hitan’ny maso rehetra. (Apok 1,7)
1 Ny Tompo no fahazavana.
Fiv: Ho hitan’ny maso rehetra.
2 Nomena ny tany tontolo.
Fiv: Ho hitan’ny maso rehetra.
3 Ny Tompo Mpanjaka Mahery.
Fiv: Ho hitan’ny maso rehetra.
4 Mandidy ny tany tontolo.
Fiv: Ho hitan’ny maso rehetra.
5 Ho avy ê ‘Lay be fahefana.
Fiv: Ho hitan’ny maso rehetra.
6 Mpitsara ny olon-drehetra.
Fiv: Ho hitan’ny maso rehetra.
7 Hiravo ‘zay manaraka Azy.
Fiv: Ho hitan’ny maso rehetra.
TONONKIRAN’I ZAKARIA (VIII.)
Sas: Tsy misy zava-miafina eo anatrehan’Andriamanitra, fa
mihanjahanja sy miharihary eo imasony avokoa. (Hb 4,13)
Andininy:
1 Deraina isaorana Izy Tompo
Ny Tompo Andriamanitr’Israely
Fa Izy efa tonga namangy antsika
Nanavotra antsika amy fahavalo.
2 Nanolotra antsika herim-pamonjena
Avy amin’ny fianakaviana iray
Dia ny an’i Davida mpanompo tiany
F’izany tokoa no efa nolazainy.
3 Fa Teniny nentin’ny Mpaminany
Dia ireo olomasiny fahagola:
Ny vonjiny hanala amy fahavalo
Hanafaka antsika amy mpankahala.
4 Noho izy nandala ny Razantsika,
Dia indro tsaroany ny Fanekeny
Fa teny nomeny an’i Abrahama
Ny hanafaka antsika amy fahavalo.
5 Am’zay ‘sika ho afa-manompo Azy
Tsy anatin’ny tahotra sy ahiahy
Fa entin’ ny fo tia sy mahatoky
Ho eo anatrehany lalandava.
6 Ianao ‘zao anaka, no antsoina:
Ho ‘lay "Mpaminanin’ny Avo indrindra“,
Hizotra anoloan’ny Tompo Ianao
Hamboatra ny lalana ‘zay hombany.
7 Ianao hanambara ny famonjena
Dia ny famelana ny hadisoana
Satria Andriamanitra fo miantra
Mandefa masoandro hamangiany antsika.
8 Fanilo hanazava reo mitakiky
Anatin’ny haizina mahafaty.
Fanilo hanazava ny diantsika
Am’lalam-piadanana lavorary.
9 Isaory ny Ray nanome antsika
Ny Zanany ho masoandrom-pamonjena!
Hobio ny Fanahy niantsoana antsika
Ho sambatra hibanjina ny mazava.
Sas: Tsy misy zava-miafina eo anatrehan’Andriamanitra,
fa mihanjahanja sy miharihary eo imasony avokoa.
RANOMBAVAKA (IX.)
Ndeha isika hivavaka hiaramankalaza an’Andriamanitra Raintsika:
mahafantatra ny mahasoa antsika Izy ary mitantana ny fiainantsika marain-tsy hariva:
Fiv: Tompo ô, tantano re izahay.
1 Misaotra Anao izahay, ry Tompo, fa nisinda ny alina ary nirotsaka ny mazava
ka afaka midera Anao eto an-tranonao izahay.
Fiv: Tompo ô, tantano re izahay.
2 Mankalaza Anao izahay, ry Tompo, noho ireo vavolombelona manambara
ny Zanakao eo anivonay sy manolotra amin’ny alalan’ny fiainany ny fanatitra
ankasitrahanao.
Fiv: Tompo ô, tantano re izahay.
3 Mankalaza Anao izahay, ry Tompo, noho ny herimpon’ireo marary sy mijaly
manambara sahady ny fandresen’Ilay Zanakao nitsangan-ko velona.
Fiv: Tompo ô, tantano re izahay.
4 Mankalaza Anao izahay, ry Tompo, noho ny famindram-ponao aminay
tsirairay avy, fa Ianao no fototry ny hasambarana sy hafalianay rehetra.
Fiv: Tompo ô, tantano re izahay.
5 Fangatahana hafa
Fiv: Tompo ô, tantano re izahay.
Rainay any an-danitra ...
Ry Andriamanitra Ray Masina ô, Ianao niantso ny vahoakanao
ka mitantana azy ho tody amin’ny tany nampanantenaina:
ombao fitahiana izahay hanara-dia an-janakao amin’ny lalam-baovao
nosoritany hahasambatra anay. Amin’ny alalan’i Jesoa Kristy.
TSODRANO (X.) [ohatra]
Mpitsodrano:
Enga anie Andriamanitra Ray
izay tsy mitsitsy na inona na inona,
ny Zanaka izay nampiboiboika onin-drano velona,
ary ny Fanahy izay mampamokatra ny tany karankaina
hampitobaka ny fahasoavany amin’ny Fiangonana.
Valiny:
Misaotra e! Fa sitrak’Andriamanitra ny hahavonjy antsika!