Talata IV Vavaka Maraina

FANAINGANA (I.)Salamo 95 (94)

Fiv: Ndao isika hientan-kafaliana amin’ny Fanahy Masina,

hiaraka amin’i Kristy. (Lk10,21)

1.Avia mifalia ka hobio ny Tompo

Ilay vatolampy sy vonjintsika,

2.Andeha mankeo anoloany hisaotra

Hihira sy hiantsa ary hankalaza Azy,

3.Fa Izy Andriamanitra sady Tompo

Mpanjakan’ireo andriamani-kafa.

Fiv: Ndao isika hientan-kafaliana amin’ny

Fanahy Masina, hiaraka amin’i Kristy.

4.Ny atin’ny tany eo am-pelatanany

Ny tampon’ny vohitra Azy koa.

5.Nataony ka Azy ny ranomasina,

N’tanety Azy koa fa asan-tanany.

6.Avia miondreha ary miankohofa

Hitsaoka Ilay Tompo nanao antsika,

Fiv: Ndao isika hientan-kafaliana amin’ny

Fanahy Masina, hiaraka amin’i Kristy.

7.Fa Izy no tena Andriamanitsika,

Isika vahoaka sy ondry fiandriny.

8.Hihaino azy ve ianareo anio?

Fa izao no ambarany sy lazainy:

9.Aza dia mafy fo toy ny tany an’efitra,

Toy ny tany Masa sy tany Meriba.

Fiv: Ndao isika hientan-kafaliana amin’ny

Fanahy Masina, hiaraka amin’i Kristy.

10.Ny razanareo dia nitsapa ahy!

Kanefa nahita ny asa vitako.

11.‘ Ty taranaka ity efapolo taona

Dia nahatofoka ahy nahatezitra ahy.

12.Vahoaka mpaniasia tokoa ity

Tsy mety hahalala ny tena lalako;

Fiv: Ndao isika hientan-kafaliana amin’ny

Fanahy Masina, hiaraka amin’i Kristy.

13.Koa tezitra aho ka nianiana

F’ireto ts’hiadana miaraka amiko.

14.‘ Ndeha isika hisaotra ny Tompontsika,

Ny Ray be fitia ‘zay nifidy antsika.

15.Ny Zanany nentiny niantso antsika,

Fanahiny kosa nomeny antsika!

Fiv: Ndao isika hientan-kafaliana amin’ny

Fanahy Masina, hiaraka amin’i Kristy.

ANTSA (II.)

Ho Anao, ry Fanahy ô, Aleloia!

1.Ho menaka nahoso-bato va re

Ny Herinao, ry Fanahy,

Sa kosa natao haninteraka

Ilay fo nofo mbola osa anatinay?

Miasa mafy lalandava ny Herinao

Mankahery, mampahomby, raha mibebaka izahay.

Ianao, ry Hery nomena hampijoro,

Toavinay Ianao, Ianao ry Hery, Aleloia!

2.Afo lavitra tsy azo amindroana va re

Ny Fitiavanao, ry Fanahy,

Sa kosa natao hanafana

Ilay fo nofo mangatsiaka anatinay?

Miredareda lalandava ny Fitiavanao

Mandrehitra sy mampitia raha mibebaka izahay.

Ianao, ry Afo Fitiavana mandoro,

Raisinay Ianao, Ianao ry Afo, Aleloia!

3.Ho tehi-marefo mampandringa va re

Ny Fahendrenao, ry Fanahy,

Sa tehina azo ianteheran’

Ny fo nofo mora lavo anatinay?

Mitari-dalana lalandava ny Fahendrenao

Manoro izay hombana raha mibebaka izahay.

Ianao, ry Fahendrena tsy tontan’ny ela,

Derainay Ianao, ry Fahendrena, Aleloia!

Setriny:Ho Anao ry Hery, ry Afo Fitiavana ô!

Ho Anao ry Fahendrena ô, Aleloia!

Ho Anao Fanahy ô, Aleloia!

SALAMO (III.)101 (100)

Sas:Eny, Mpanjaka Aho, hoy ny navalin’i Kristy teo anatrehan’ i Pilaty.

Izay mivelona amin’ny fahamarinana dia mihaino ny Teniko. (Jo 18.37)

Andininy:

1.Ndeha hohiraiko ny indrafo mbamin’ny fitsaran’ny Tompo:

Ary Ianao, ry Tompo, no hoderaiko!

2.Amin’ny lalana falehan’ny lavorary no halehako;

Rahoviana Ianao no ho tonga eto amiko?

3.Izaho miaina amin’ny fo mahitsy ary koa lavorary

Ao an dapam-panjakana izay onenako.

4.Tsy misaina velively na manopy maso akory

Amin’izay fanaovana asa ratsy aho.

5.Hankahalaiko raha ny asan’ny mpihatsaravelatsihy,

Ary tsy hahakasika ahy na kely aza.

6.Koa ataoko lavitra ahy raha izay fo miolakolaka,

Ary tsy horaharahaiko ny olon-dratsy.

7.Ireo mpanaratsy namana any am-badika any kosa,

Hataoko tankina tsy hahaloa-peo.

8.Ny fijery mianjonanjona sy ny fo miavonavona,

Dia tsy azoko andeferana mihitsy.

9.Ireto masoko hijery ny olom-pino eto an-tany:

Izy ireo no hitoetra eto anilako.

10.Izay mahay mitondra tena amim-pahitsiana marina,

Izy indrindra no ho mpiara-miasa amiko.

11.Sanatria raha mba hanana toerana ao an-dapako

Raha izay olona efa zatra misoloky.

12.Ary ny olona mpandrobo zatra laingalainga foana,

Tsy hahajoro velively eo imasoko.

13.Isan’andro vao maraina dia haringako ho tankina

Ny olon-dratsy eto amin’ny fireneko.

14.Mba ho foana avokoa ny olo-meloka rehetra

Tsy ho ao amin’ny vohitry ny Tompo.

15.Koa isaorana Ianao, ô ry Ray tsy manavaka,

Sy i Jesoa Ilay nandray ireo madinika.

16.Ary isaorana Ianao, ry Fanahy Mpanolo-tsaina

Hanoherana ny tsindrihazolena!

Sas:Eny, Mpanjaka Aho, hoy ny navalin’i Kristy teo anatrehan’ i Pilaty.

Izay mivelona amin’ny fahamarinana dia mihaino ny Teniko.

TONONKIRA (IV.)Dan 3,26-41

Sas:Tsy ny asa andidian’ny lalàna no anamarinana ny olona,

fa ny finoana an’i Jesoa Kristy. (Gal 2,16)

Andininy:

1.Koa isaorana Ianao, ô ry Tomponay:

Andriamanitr’ireo razanay Ianao,

Ary mendrika dera ny Anaranao,

Ka omem-boninahitra ho doria!

2.Eny. marina Ianao amin’ny Asanao,

Dia ireo izay nataonao taminay.

He nanota izahay fa nandao Anao.

Toy ny an’ny tsy mpino ny asanay.

3.Hadisoana tokoa re no vitanay!

Nefa noho ny amin’ny Anaranao,

Aza ilaozana mandrakizay izahay,

Aza foanana koa re ny Fanekenao.

4.Aza alàna aminay ny Fitiavanao,

Noho i Abrahama sakaizanao,

Ary noho i Isaaka mpanomponao,

Mbamin’i Israely ilay maminao.

5.Fa nomenao fampanantenana ireo,

Dia ny hahamaro isa ireo taranany

Izay ho tahaka ny kintana eny an-danitra,

Sy ny fasika amoron’ny ranomasina.

6.Indro kely dia kely izahay, ry Tompo,

Raha mitaha amin’ireo firenena hafa,

Sy voaetry amin’ny tany rehetra koa,

Noho ireo fahotana nataonay.

7.Tsy mba mana-mpifehy izahay izao,

Na manam-pahefana na mpaminany,

Na mba sorona dorana na fanatitra,

Na mba emboka manitra kely akory.

8.Tsy mba misy toerana halehanay

Hitondrana ny voaloham-bokatray,

Ka hanaterana azy anatrehanao,

Hahazoanay sitraka avy aminao.

9.Nefa raiso ny fonay izay torotoro,

Ary koa ny fanahinay mietry tena,

Ho toa sorona ondry aman’ombalahy,

Sy ho toa zanak’ondry matavy arivo.

10.Izany sorona ataonay izany anie,

Amin’izao andronay ankehitriny izao,

Hahitanay fitia anatrehanao;

Izay mitoky aminao tsy mba azon-kenatra.

11.Koa dia amin’ny fonay tokoa izahay,

No manjohy sy manaraka Anao izao,

Ka matahotra Anao sy manaiky Anao,

Sady manina hahita ny Tavanao.

12.Koa ny Ray izay mangoraka ireo mivalo,

Sy ny Zanaka sorona ho solo heloka,

Ny Fanahy mahaova ny aty fo,

No ‘ndeha hoderaintsika, ô ry mpino.

Sas:Tsy ny asa andidian’ny lalàna no anamarinana ny olona,

fa ny finoana an’i Jesoa Kristy.

SALAMO (V.)144 (143),1-11 [10]

Sas:Aoka re ianao ho mpandresy

Handresy ny ratsy amin’ny tsara.(indroa)

Aoka re ianao ho mpandresy

Handresy ny haizina amin’ny hazavana.(indroa)

Aoka re ianao ho mpandresy

Handresy ny hala volo amin’ny fitiavana. (Rom 12,21) (indroa)

Andininy:

1.Hoderaina anie Ianao, ry Tompo ô!

Hoderaina anie Ianao, Ilay Vatolampiko!

Mpanazatra ireto tanako hiady;

Mpampianatra ny sandriko hiantafika.

2.Mpanomba sady mandako Izy manko,

Ilay Rovako ary koa Mpanafaka ahy.

Eny, Izy no Ampingako miaro ahy.

Omeny ahy ny fizakana ny vahoakako.

3.Inona àry ny olombelona, ry Tompo,

No mba tsarovanao izato izy,

Ary inona ny zanak’olombelona

No mba saininao ho zavatra tokoa?

4.Toy ny tsiodrivotra, eny, ny olombelona,

Ary aloka miserana ny androny.

Aondreho ny lanitrao, midîna, Tompo;

Dia kasiho ny tendrombohitra hirehitra.

5.Alefaso hifanaretsaka ny tselatra,

Atorahy ny tsipîka, hampatahotra.

Ny tananao ahinjiro avy any ambony,

Ary dia ho afaka tokoa izany tenako.

6.Dia avoty aho amin’ny rano be,

Amin’ny tanan’ireo hafa firenena:

Lainga foana no hambaran’izy ireny,

Ary tanana mpamitaka ny tanany.

7.Ianao no hoderaiko sy hobiko,

Hobiko amin’ny antsa vaovao;

Ary koa hitendreko valiha,

Dia valiha tory folo mikarantsana.

8.Eny, izany dia ho Anao Ilay mahatonga

Ireo mpanjaka eran-tany ho mpandresy,

Sy miaro an’i Davida ilay mpanompo

Tsy ho voan’izay sabatra mamono.

9.Dia avoty ka vonjeo aho, ry Tompo ô,

Amin’ny tanan’ireo hafa firenena:

Lainga foana no ambaran’izy ireny,

Ary tanana mpamitaka ny tanany.

10.Hoderaina Ianao, Ray, Ilay tsara fo

Tia mamaly ny haratsiana amin’ny tsara;

Sy i Jesoa Mpandresy ny ota amin’ny Fitiavana;

Ary Ianao Ilay Mpankahery ny mpikatroka.

Sas:Aoka re ianao ho mpandresy

Handresy ny ratsy amin’ny tsara.(indroa)

Aoka re ianao ho mpandresy

Handresy ny haizina amin’ny hazavana.(indroa)

Aoka re ianao ho mpandresy

Handresy ny hala volo amin’ny fitiavana. (Rom 12,21) (indroa)

TENIN’ANDRIAMANITRA (VI.)Iz 55,1

Ianareo rehetra izay mangetaheta, mankanesa aty amin’ny rano, na dia ianareo tsy manam-bola aza; avia mividiana vary, ka mihinana; avia hividy tsy amim-bola, na takalo, hividy divay sy ronono.