Talata IV Vavaka Hariva

ANTSA (I.)

Raha sendra havizanana – Rano, Rà, Fanahy (1 Jn 5,6-8)

1. Raha sendra havizanana

No tojo hafanana,

Mirepirepy fanina

Fa main’ny hetaheta,

Tsy lavitra kanefa

Jereo ny loharano, jereo,

Miboika tsisy fetra,

Mandonaka ny tany.

Ry Jesoa Tomponay ô, Ianao no Ranovelona,

“ Avia, hoy Ianao, avia ka misotroa”

Izay main’ny hetahetam-pahamarinana. (Jn 7,37)

2. Raha sendra hasasarana

No tojo fisedrana,

Manjepizepy fanina,

Ka toy ny ho afaka aina.

Tsy lavitra kanefa

Banjino fa miboika, banjino,

Tsy miato ‘zao ny Ràko

Hamerina ny aina.

Ry Jesoa Tomponay ô, Ianao no Rà mpamelona,

“ Avia, hoy Ianao, avia ka misotroa”

Ny Rako odifaty: onim-pahafahana ô. (Jn 6,56; Mt 26,27-28)

3. Raha sendra ny hamaizana

No tojo fahosana,

Mandraingiraingy marina

Gejain-d Rafahotana.

Velomy ny Finoana

Banjino fa tsy ritra, banjino,

Fanahy Ranovelona

Mamelona ny Ràko.

Ry Jesoa Tomponay ô, ny Fanahy mpanamasina

No indro atolotrao ho Fahamarinanay,

Fa Izy, hoy Ianao, „Fanahim-panafahana“ ô. (Ef 5,18)

SALAMO (II.)137 (136)

Sas: Any an-danitra any no tanànantsika

sy iandrasantsika Mpamonjy, dia i Kristy,

Ilay hanova ny vatantsika

hitovy endrika amin’ny Azy mamirapiratra. (Fil 3,20-21a)

Andininy:

1. Teo amoron’ny onin’i Babilôna,

Teo izahay nitorovoka tamin’ny tany,

Nitomany fa manina ilay Siôna.

Tamin’ny hazomalahelo teny ho eny

No nahantonay, ho’ aho, ny lokanganay.

2. Fa nangataka hira ireo mpandresy anay,

Ka nanery anay hifaly ireo mpampahory

Hoe: „Kaloy aminay ny hiran’i Siôna“.

Fa hataonay ahoana ary no fihira

Izany hiran’ny Tompo any an-tanin’olona?

3. O ry Jerosalema ô, sanatria,

Raha toa ka izaho no hanadino anao,

Dia ny tanako havanana aoka halemy.

Izany lelako hiraikitra an-danilaniko

Raha hoe ka izaho tsy hisaina anao.

4. Raha toa tsy ilay Jerosalema koa

No hatao fara tampon’ny fifaliako,

Dia ny tanako havanana aoka halemy.

Izany lelako hiraikitra an-danilaniko

Raha hoe ka izaho tsy hisaina anao.

5. Sanatria, tsy isika no hanadino

Ilay Vohitra masina vaovao,

Koa tsarovy ny Mpahary miandry antsika any,

Sy ny Zanaka Mpialoha lalana antsika,

Ny Fanahy Mpitantana, azo antoka!

Sas: Any an-danitra any no tanànantsika

sy iandrasantsika Mpamonjy, dia i Kristy,

Ilay hanova ny vatantsika

hitovy endrika amin’ny Azy mamirapiratra. (Fil 3,20-21a)

SALAMO (III.)138 (137)

Sas: Ny firenen-drehetra dia hizotra tarafin’ny hazavan’ilay Tanàna masina,

ary ny mpanjaka eran-tany hitondra ao ny voninahiny. (Apok 21,24)

Andininy:

1. Amin’ny foko manontolo

No isaorako Anao, ry Tompo ô,

Anoloan’ny Anjely aho no miantsa Anao,

Miankohoka manatrika ny Tempolinao masina.

2. Ny Anaranao isaorako

Noho ny fitiavana amam-pahamarinanao,

Fa satria ny Anaranao ary koa ny Teninao

D ia asandratrao ambony noho ny zavatra rehetra.

3. Ny andro iantsoako, Ianao mamaly

Ary mampitombo hery ny fanahiko;

Dia misaotra Anao daholo ny mpanjaka eto an-tany

Fa hahaheno ireo teny nolazain’ny Vavanao.

4. Dia ny Lalan’Izy Tompo

No hirain’izy ireo hatrany hatrany

Hoe: „Lehibe tokoa ny Voninahitry ny Tompo!“

Na ambony aza Izy, mahatsinjo ny madinika.

5. Avy lavitra ny Tompo

Mahatazana ny olo-mpiavonavona.

Raha mizotra afovoam-pahoriana lalina aho,

Dia Ianao indrindra, Tompo, no mamelombelona ahy.

6. Ny fahavaloko efa vinitra

Aninjiranao ny tananao, ry Tompo,

Ka ny tananao havanana no ahazoako fandresena.

Tokoa moa raha mba misy tsy ataon’ny Tompo ho ahy!

7. Ny fitiavanao, ry Tompo,

Dia maharitra doria mandrakizay.

Aza ilaozanao ny asa soa nataon’ny tananao.

Koa misaotra Anao izahay, ô ry Andriamanitra ô!

8. Avo indrindra Ianao, ry Ray

Ilay mitsinjo anay madinika sy kely,

Sy Ianao Jesoa Mpamonjy nietry tena ho toa anay,

Ary Ianao Fanahy Masina Fitiavana sy Hery.

Sas: Ny firenen-drehetra dia hizotra tarafin’ny hazavan’ilay

Tanàna masina, ary ny mpanjaka eran-tany hitondra ao ny voninahiny.

TONONKIRA (IV.)Apok 4,11; 5,9-10.12 na: 1 Joany 1,5-9

Andininy:

1. Izao no nohafaran’i Jesoa Kristy,

Ka ambara anareo fa izahay no nandre:

Andriamanitra dia Fahazavana,

Tsisy haizina akory ao aminy.

Fiv: Ny Ràn’i Jesoa Zanak’Andriamanitra no manadio antsika.

2. Raha toa, sanatria, ka milaza isika

Fa hoe miombona amin’ny Tompo Andriamanitra,

Nefa isika mandeha amin’ny maizina,

Dia mandainga, tsy manao ny marina.

Fiv: Ny Ràn’i Jesoa Zanak’Andriamanitra no manadio antsika.

3. Fa raha ny mazava no izorantsika

Toa Azy ao anaty Mazava hatrizay

Dia miombona isika samy isika,

Ary diovina amin’ny fahotan-drehetra.

Fiv: Ny Ràn’i Jesoa Zanak’Andriamanitra no manadio antsika.

4. Raha toa, sanatria, ka milaza isika

Fa hoe tsy mba manana fahotana mihitsy,

Dia izany no mamita-tena,

Ary tsy ao amintsika ny marina.

Fiv: Ny Ràn’i Jesoa Zanak’Andriamanitra no manadio antsika.

5. Fa raha miaiky heloka kosa isika,

Mahatoky sy marina Izy Tompo Andriamanitra,

Ka hamela ny fahotantsika

Sy handio ny hadisoantsika.

Fiv: Ny Ràn’i Jesoa Zanak’Andriamanitra no manadio antsika.

TENIN’ANDRIAMANITRA (V.)Jo 16,13-15

Talohan’ny hialan’i Jesoa amin’izao tontolo izao hankany aminny Ray, dia hoy Izy: Rahefa tonga ny Fanahy Fahamarinana, dia Izy no hampahalala anareo ny marina rehetra, satria tsy hiteny araka ny nahiny Izy, fa izay rehetra ho reny no holazainy, ary izay tsy maintsy ho tonga no hambarany anareo. Hanome voninahitra Ahy Izy, satria handray ny avy amiko ary hampita izany aminareo. Ahy izay rehetra ananan’ny Raiko; izany no nilazako fa izay horaisiny avy amiko no hambarany anareo.

VALINKIRA (VI.)

Fiv: Mba omeo anay ny Fanahy Mpanazava, ô ry Jesoa! (Jo 14,26)

1. ‘ Zay rehetra nolazain’ny Raiko ahy, no nambarako anareo. (Jo 15,15)

Fiv: Mba omeo anay ny Fanahy Mpanazava, ô ry Jesoa!

2. Ianareo dia votsa saina mpanadino; tadidio izay nolazaiko. (Lk 24,25 sy 24,6)

Fiv: Mba omeo anay ny Fanahy Mpanazava, ô ry Jesoa!

3. Mbola tsy ampy fahalalana ianareo, ka ho avy ny Fanahy. (Jo 12,16; 13,7; 14,26)

Fiv: Mba omeo anay ny Fanahy Mpanazava, ô ry Jesoa!

4. Lasana aho ka tsy ho hita eto intsony, Izy hitoetra am-ponareo. (Jo 16,13)

Fiv: Mba omeo anay ny Fanahy Mpanazava, ô ry Jesoa!

5. Zava-tsoa no fanomenareo ny zaza; ny an’ny Raiko, ny Fanahy ... (Lk 11,13)

Fiv: Mba omeo anay ny Fanahy Mpanazava, ô ry Jesoa!

6. Izy hanoro sy hampahatsiaro anareo izay voalazako rehetra.

Fiv: Mba omeo anay ny Fanahy Mpanazava, ô ry Jesoa!

7. Isan’andro dia hadikany hatrany Ireo Hafatra navelako. (Jo 14,26)

Fiv: Mba omeo anay ny Fanahy Mpanazava, ô ry Jesoa!

TONONKIRAN’I MARIA (VII.)

Sas 1: Ny Fanjakan’ny lanitra dia tahaka ny lalivay

naharo taminfny koba intelon’ny famarana,

ka nampitombo ny koba manontolo. (Mt 13,33) na:

Sas 2: Tampotampoka teo dia hita nizotra

Teny ambony ranomasina;

Tampotampoka teo dia hita nitety ny onja i Jesoa.

Vonona ny handray Azy ho any an-tsambokely ny mpianany,

kinanjo indro fa tonga sahady, |

tody soa sahady isika miaraka aminy. | indroa (Jo 6,19b-21)

Andininy:

1 Ny foko midera ny Tompontsika

Ny saiko mifaly amin’Andriamanitra

Noho Izy Mpamonjy nitsinjo ahy

‘ Lay mpanompovaviny tsinontsinona.

2 Fa indro manomboka ankehitriny

Hantsoin’ny taranaka: „Sambatra“ aho.

Nahavita be tamiko ilay Mahefa

Ilay hoe: „Ny Masina no Anarany“.

3 ‘ Lay mandrakizay ny indrafony

Am’ny olon-drehetra matahotra Azy,

‘ Lay Tompo Mpandresy mahery sandry

Mampihahaka ireo ‘zay mpiavonavona.

4 Manongana ireo izay mpanjakazaka,

Kanefa manadratra ireo ambany;

Manototra soa an’ireo noana

Fa mampody maina an’ireo mpanana.

5 Mpanarina an’Israely olony

Satria mahatsiaro ny indrafony

Nampanantenainy ny Razantsika

Ho an’i Abrahama sy izay taranany.

6 ‘ Lay Ray be fitiavana mba derao,

Hobio ‘lay Zanany tonga nofo,

Ar’ koa ‘lay Fanahy Mampiray antsika

Ho mandrakizay alaovalo!

Sas 1: Ny Fanjakan’ny lanitra dia tahaka ny lalivay

naharo taminfny koba intelon’ny famarana,

ka nampitombo ny koba manontolo. na:

Sas 2: Tampotampoka teo dia hita nizotra

Teny ambony ranomasina;

Tampotampoka teo dia hita nitety ny onja i Jesoa.

Vonona ny handray Azy ho any an-tsambokely ny mpianany,

kinanjo indro fa tonga sahady, |

tody soa sahady isika miaraka aminy. | indroa

RANOMBAVAKA (VIII.)

Raha olona iray tsara taiza mahalala fomba aza, tsy manadino ny

misaotra izay olona nahazoany zavatra kely, mainka ve isika tsy

tokony hisaotra ny Fanahy Masina noho ny hatsarany sy noho

izay omeny antsika!