Alatsinainy IV Vavaka Maraina

FANAINGANA (II.) Salamo 67 (66)

Fiv:Ho fanomezam-boninahitra an’Andriamanitra anie

ny asantsika rehetra, Aleloia. (jereo Kol 3,17) (Asolo ny Aleloia: Voninahitry ny Ray)

1Hiantran’Andriamanitra anie isika hotsimbininy

Ka hataony mamiratra eo amintsika ny tavany!

2Dia ho fantatry ny olona eran-tany ny herinao,

Ka hanerana ireo firenen-drehetra ny vonjinao!

Fiv:Ho fanomezam-boninahitra an’Andriamanitra anie

ny asantsika rehetra, Aleloia.

3Ny vahoaka rehetra enga anie hidera, Andriamanitra ô,

Ny vahoaka rehetra enga anie hidera ny Anaranao!

4Aoka hifaly sy hiantsa ny firenena isan-tokony

Fa Ianao dia mitsara azy rehetra ireny ara-drariny.

Fiv:Ho fanomezam-boninahitra an’Andriamanitra anie

ny asantsika rehetra, Aleloia.

5Fa Ianao dia mitsara vahoaka araka ny hitsiny

Sy manjaka am’ireo firenen-drehetra isan-tokony.

6Ny vahoaka rehetra enga anie hidera, Andriamanitra ô,

Ny vahoaka rehetra enga anie hidera ny Anaranao!

Fiv:Ho fanomezam-boninahitra an’Andriamanitra anie

ny asantsika rehetra, Aleloia.

7Fa ny tany volena tsy misy izay tsy mamokatra,

Andriamanitra manko Andriamanitsika: mitsimbina.

8Enga anie ka hitsimbina antsika hatrany Andriamanitra,

Ka ho masina eran’ny vazan-tany ny Anarany!

Fiv:Ho fanomezam-boninahitra an’Andriamanitra anie

ny asantsika rehetra, Aleloia.

9Voninahitra anie ho an’ny Ray nandefa ny Zanany

‘ Zay nomeny hanasoavany antsika noho ny Fitiavany!

Fiv:Ho fanomezam-boninahitra an’Andriamanitra anie

ny asantsika rehetra, Aleloia.

ANTSA (II.)

1.Raha tojo ny patsa iray tsy omby vava,

Fa fongana tampoka izay nantenaina,

Nikoa izay naorina sy nokasaina ...

Ankino amin’ny Tompo ny fo aman-tsaina ...

Tsarovy i Josefa, ilay sahiran-tsaina,

Nomen’Izy Tompo fampanantenana

Ho Rain’ny Mesia:

Anilan’ireo miady saina ny Tompo

ka mihaino azy ireny.

2.Raha tojo olam-piainana saro-bahana,

Raha sendra safidy mitaky finoana,

Ka ny valin-teny haningotra ny aina ...

Ankino amin’ny Tompo ny to aman-tsaina ...

Tsarovy i Maria, nanaiky ny Teny,

Nomen’Andriamanitra ny hafaliana

Ho Renin’ny Tompo:

Miandany amin’ny olon-tia Azy Ilay Avo

ka mitsinjo azy ireny.

3.Raha tojo safidy hihatra aman’aina,

Ho sandan’ny fiainana izay hosedraina,

Tanaty fitiavana sy fanekena ...

Ankino amin’ny Tompo ny mafy hozakaina ...

Tsarovy i Jesoa tao Getsemania,

Nomen’ny Rainy ny Voninahitra

Sahaza ny Zanaka:

Miandany amin’izay manaiky Azy ny Ray,

ka manangana azy ireny!

4.Raha lavo nitrosina noho ny halemena,

Namadika toky sy teny nekena,

Ka mila ho resin’ny fahakiviana ...

Ankino amin’ny Tompo, na fahotana aza ...

I Piera nibaboka ny hakanosàny,

Nomen’i Jesoa fampanantenana

Ho Andrim-piangonany:

Manatona ny olo-nanota ny Tompo,

ka manova azy ireny.

SALAMO (III.)90 (89)

Sas:Ny fiainana mandrakizay dia ny mahalala Anao Ray hany Andriamanitra

marina, sy i Jesoa Kristy Ilay nirahinao, Aleloia! (Jo 17.3)(Asolo ny Aleloia: ry Ray ô)

Andininy:

1.Ianao no fialofana ho anay, ry Tompo ô,

Tamin’ny taona nifandimby hatrizay hatrizay.

2.Fa tsy mbola nisy teraka irony tendrombohitra,

Moa ny tany koa tsy ary mbamin’izao rehetra izao,

3.Dia efa Ianao tokoa anie no Ilay Tompo Andriamanitra,

Hatrizay ka ho mandrakizay doria antaranoana.

4.Ny taranak’olombelona ampodinao ho vovoka

Hoe: „Modia, hoy Ianao, ô ry zanak’i Adama!“

5.Aminao ny arivo taona dia mandalo toy ny omaly,

Seran’andro iray monja, sombin’alina iambenana.

6.Nataonao indray mifaoka izy ireny: zary nofy,

Ka misinda vao maraina, sy miserana toa ahitra:

7.E! mamelana maraina ka miserana tokoa,

Fa rahefa takariva dia milofika malazo.

8.Fa ny hatezeranao dia mahafoana anay,

Ary ny haviniranao dia mampihorohoro anay.

9.Nahariharinao imaso irony hadisoanay,

Ny tsiambaratelonay anoloan’ny tavanao.

10.Ny andronay mihafohy raha tezitra Ianao,

Indray mihelina toa sento ireo taona iainanay.

11.Fitopolo taona monja no anjara fiainanay

Izay maharitra indrindra no mahatratra valopolo.

12.Fa ny maro amin’ireny fijaliana sy tomany,

Eny, mihelina tokoa dia ilaozanay ny tany.

13.Zovy moa no hahalala ny herin’ny hatezeranao?

Zovy koa no hahatsinjo izany haviniranao?

14.Ampianaro izahay hahay hanisa ny andronay,

Hahatonga ny fonay amin’izany fahendrena.

15.Miverena re, ry Tompo! Eny, rahoviana re?

Ary aoka Ianao hilefitra aminay mpanomponao!

16.Vao maraina dia fenoy ny fitiavanao izahay

Mba hifaly sy hiravo amin’ny andronay rehetra.

17.Mba soloy ho hafaliana ireo andro amaizanao

Mbamin’ny taona izay niaretanay ny ngidim-pahoriana.

18.Ny mpanomponao re, mba anehoy ny asanao,

Ny taranaka amam-para, ny famirapiratrao.

19.Enga anie ka homba antsika mianakavy hatrany hatrany,

Izany halemem-panahin’Izy Tompo Andriamanitra.

20.Hamafiso hahasoa ireo asa vitanay,

Hamafiso re ny vokatry ny asan-tananay!

21.Mba hobio ny Ray nahary izay namelona ny Zanany

Santatry ny hitsanganantsika ao amin’ny Fanahy.

Sas:Ny fiainana mandrakizay dia ny mahalala Anao Ray hany

Andriamanitra marina, sy i Jesoa Kristy Ilay nirahinao, Aleloia!

TONONKIRA (IV.)Izaia 42,10-16

Sas:Matokia ianareo, fa Izaho Kristy

efa naharesy an’izao tontolo izao. (Jo 16.33)

Andininy:

1.Mandredòna hira vao ho an’ny Tompo!

Koa samia midera Azy

Avy any am-para-vazan-tany any

Ianareo tandranomasina sy izay anatiny ao,

Ianareo, ry nosy maro sy ny mponiny rehetra.

2.Aoka samy hanandra-peo ny tany efitra

Sy ny vohitra ao aminy,

Mbamin’ny toby izay onenan’i Kedara!

Ny mponina any Ankaram-bato aoka hihobin-karavoana;

Ny any an-tampon-tendrombohitra, hihora-pifaliana!

3.Eny, aoka anie ireny hanome

Voninahitra ny Tompo,

Ary hampanakoako fiderana,

Dia fiderana Azy any amin’ny nosy maro!

Fa ny Tompo indro avy toy ny lehilahy mahery.

4.Dia fohaziny ny firehetam-pony

Toy ny lehilahy mpiady.

Miantsoantso mafy izy sy mandrahona,

Ary indro fa miroso manoloana fahavalo,

Toy ny lehilahy mahery feno herim-po tokoa.

5.„ Efa hatry ny ela aho no nangina,

Nikombom-bava tsy niteny,

Sy nanindry koa ny foko tsy hitroatra.

Fa izao dia mitaraina toy ny olomihetsi-jaza,

Misefosefo sady sempotra tsy avy miaina aho.

6.Ny tendrombohitra rehetra sy havoana

Horavako avokoa;

Ny zava-maitso rehetra eny, ataoko maina,

Ary ny ony hampanjariako tora-pasika makiana,

Moa ny dobo sy kamory horitraiko mba ho maina.

7.Amin’izay dia hotarihiko ny jamba

Hankamin’ny lalana tsy fantany;

Hampizoriko amin’ny lalana tsy hainy,

Ny haizim-pito hataoko tonga hazavana ho azy ireo,

Ny korontam-bato kosa hanjary lalana mahitsy.

8.Voninahitra ho Anao, ry Ray.

Ilay Tompon’ny tantara

Amin’ny fiainan’olombelona rehetra,

Dera anie ho Anao, Jesoa, Ilay nandresy ny haratsiana;

Dera anie ho Anao, Fanahy, mpanova sento ho hafaliana.

Sas:Matokia ianareo, fa Izaho Kristy

efa naharesy an’izao tontolo izao.

SALAMO (V.) 134 A (135 A)

Sas:Nanala antsika tamin’ny fahefan’ny haizina Andriamanitra Ray, ka namindra

antsika amin’ny Fanjakan’ny Zanany malala, Ilay ahazoantsika ny fanavotana sy

ny famelan-keloka. (Kol 1,13-14)

Andininy (1-7.14):

1.Ka derao e ny Anaran’ny Tompontsika!

Ry Mpanompon’ny Tompo samia midera.

Ianareo ‘zay mitoetra ao an-tranony ao,

Ao an-kianjan’ny Tompo Andriamanitsika!

2.He! derao ‘zany hasoan’ny Tompontsika!.

‘ Zany Anarany mamy ê, redony an’antsa.

I Jakôba voafidin’ny Tompo ho Azy;

Ka nataony fananany i Israely.

3.Dia fantaro fa ambony, lehibe ny Tompo,

Ka mihoatra an’ireo andriamani-kafa.

Fa izay sitrapony dia tontosainy,

Any an-danitra ambony sy eto an-tany.

4.Ranomasina sy hantsam-be rehetra,

Dia samy anehoany ny sitrapony.

‘ Rony rahona akariny hitatao

Ka ny ora-manelatra manjopiaka!

5.‘ Tony rivotra tsofiny hivoaka hiala

Avy amin’ny toerany nitobiany!

Dia nasiany ny lahimatoa rehetra

Na ny biby na ny olona tao Ejipta.

6.Famantarana maro sy fah’gagana

No nalefany hamely an’i Faraona;

Dia nikapoka maro amy firenena,

Nahafaty mpanjaka mahery vaika!

7.Ry Sihôna mpanjakan’ny Emoria,

Sy ry Oga mpanjakan’ny ao Basana.

Ka ny tanin’ireny nomeny ho lova

Ho lovan’ny vahoakan’Israely!

14.Hoderaina ny Anaran’ny Ray Nahary

Fa Mpanjakan’ny lanitra sy ny tany

Omen-dera ny Zanany Lahimatoa

Ary koa ny Fanahy ‘zay Mpanolo-tsaina.

Sas:Nanala antsika tamin’ny fahefan’ny haizina Andriamanitra Ray, ka namindra

antsika amin’ny Fanjakan’ny Zanany malala, Ilay ahazoantsika ny fanavotana sy

ny famelan-keloka. (Kol 1,13-14)

TENIN’ANDRIAMANITRA (VI.)Gal 6,1-3

Ry Rahalahy, raha misy nanao hadisoana dia aoka ho ianareo anti-panahy no hanarina azy amin-kamoram-po; ary mitandrema tena ianao, moa ianao koa tsy mety ho azon’ny

Fakam-panahy? Koa mifanotrona am in’ny zava-manahirana ianareo, ary amin’izany

anatanterahana ny lalàn’i Kristy. Satria raha misy manao ny tenany ho zavatra, kanefa

izy tsy inona akory, dia mamita-tena.