Alahady IV Vavaka Hariva

ANTSA (II.)

1. Jesoa Kristy ô,

Rahefa miposaka iny ny andro,

Ka te hamololona;

Hiara-migoka ny tana-masoandro

Ny tany tontolo.

Tsaroanay ny lanitr’i Betilehema,

Andro Noely!

Dia avy manatona Anao izahay

Fa te hampamokatra, eny e,

Tsirim-piadanana isan-tokonana. (indroa)

Fiv: I Jesoa Tompo, Masoandron’ny fiainana.

2. Jesoa Kristy ô,

Rahefa misandratra iny ny andro

Ka te hibaliaka;

Hiara-migoka ny tana-masoandro

Ny tany tontolo.

Tsaroanay ny lanitr’i Jerosalema,

Andron’ny Paka!

Dia avy manatona Anao izahay

Mba ho tafatsangana, eny e,

Hiara-misotro ny herin’ny Fiainana. (indroa)

Fiv: I Jesoa Tompo, Masoandron’ny fiainana.

3. Jesoa Kristy ô,

Rahefa mandrorona iny ny andro,

Ka te hitandavana;

Hiara-matory amin’ny masoandro mody

Ny tany tontolo.

Tsaroanay ny lanitry ny Vohitra Oliva,

Andro Fiakarana!

Dia avy manatona Anao izahay

Hifanapatapaka ahitra, eny e,

Ny amin’ny andro hiverenanao indray.

Fiv: I Jesoa Tompo, Masoandron’ny fiainana.

SALAMO (II.) 110 (109)

Sas: Eny, Mpanjaka Aho, hoy ny navalin’i Kristy teo anatrehan’i Pilaty.

Izay mivelona amin’ny fahamarinana, dia mihaino ny teniko. (Jo 18,37)

Andininy:

1. Izao no tenin’ny Tompo tamin’ny tompoko:

„ Ianao mipetraha avy eto ankavanako,

Ny fahavalonao dia indro hataoko

Hanjary fitoeran’ireo tongotrao“.

2. Atsotran’ny Tompo avy eto Siôna

Ny tehina maherin’ny fiandriananao:

„ Koa dia manjakà ary koa manampara

Hatrany ampovoan’ny fahavalonao“.

3. Ny andro hisehoan’ny fahefanao,

Ianao dia mpanjaka, mamira-pahamasinana:

„ Fa tahaka ny andro mazava atsinanana

Niteraka ny ando, Izaho niteraka anao“.

4. Fa izao ny velirano nianianan’ny Tompo,

Tamin’ny toky tsy miova, tsy misy anenenany:

„ Ianao dia Mpisorona mandrakizay,

Araka ny satan’i Melkisedeka“.

5. Hijoro ny Tompo eo ankavananao,

Hamotika mpanjaka amin’ny andron-katezerany.

Amin’ny riaka, hisotro eny an-dalana izy

Noho izany dia hatrakany hatrany ny lohany.

6. Derao ny Ray be fitiavana antsika!

Ny Tompo nandresy ny fahafatesana;

Derao ny Fanahy nananganana antsika,

Ho mandrakizay ka ho mandrakizay.

Sas: Eny, Mpanjaka Aho, hoy ny navalin’i Kristy teo anatrehan’i Pilaty.

Izay mivelona amin’ny fahamarinana, dia mihaino ny teniko.

SALAMO (III.)112 (111)

Sas: Mizora toy ny zanaky ny mazava, fa ny asan’ny mazava

dia asa soa sy fahitsiana ary fahamarinana. (Ef 5,8-9)

Andininy:

1. Eny, sambatra ny olona

Izay matahotra ny Tompo,

Mankatelina tanteraka ny Didiny.

2. Ny taranaka amam-parany

Dia hahery eto an-tany;

Hohasoavina ny teraky ny marina.

3. Dia fananana sy harena

No miavosa ao an-tranony,

Ary haharitra doria ny fahamarinany.

4. Hazavana no miposaka

Ao anaty haizim-pito

Ho an’ny olona izay mahitsy fo;

5. Dia ireo mamindra fo

Sy miantra ary marina.

Ary izay tsara fanahy, mampisambotra.

6. Dia ataony amim-pahitsiana,

Ny fitantanana ny asany.

Ary izy tsy ho solafaka mihitsy.

7. Ny olomarina hotsarovana

Amin’ny taona mifandimby

Tsy hatahorany ireo tsaho milaza loza.

8. Tsy mihontsona ny fony

Fa miankina amin’ny Tompo.

Mahazo toky hatrany, tsy matahotra.

9. Ny fahamarinany e

Dia haharitra doria,

Ny voninahitra aman-dazany hitombo.

10. Mahita izany ny olon-dratsy

Ka dia romotra mihitsy,

Mihidy vazana, very hevitra aoka izany.

11. Ny fanirian’ny olon-dratsy

Dia ho levona, ho foana ...

Koa isaorana Andriamanitra Ilay Marina.

12. Ny hany atahoranay,

O ry Ray Mpahary ô:

Tsy hahavaly ny fitiavanao izahay.

13. Ny hany atahoranay,

Ry Jesoa Mpamonjy ô:

Sao mihataka aminao re izahay.

14. Ny hany atahoranay,

Ry Fanahy Masina ô:

Sao mampalahelo Anao re izahay.

Sas: Mizora toy ny zanaky ny mazava, fa ny asan’ny

mazava dia asa soa sy fahitsiana ary fahamarinana.

TONONKIRA (IV.)1 Joany 4, 8-12

Fiv: Fitiavana Andriamanitra!

Andininy:

1 . Izay tsy tia dia tsy mahay na mahalala an’Andriamanitra

Fa satria Andriamanitra: Fitiavana.

2. Toy izao no nisehoan’ny Fitiavan’Andriamanitra:

Andriamanitra naniraka ny Zanany:

3. Andriamanitra naniraka ny Zanany, 1lay Tokany

Honina eto amin’izao tontolo izao.

4. Mba ho amin’ny alalany no ivelomantsika.

Izao izany fitiavana izany.

5. Tsy isika anie akory no nitia an’Andriamanitra,

Fa dia Izy no nitia antsika kosa

6. Sy naniraka ny Zanany ho sorona fifonana,

Fanonerana ireo fahotantsika.

7. O ry havako malala, raha tahaka izany moa

No nitiavan’Andriamanitra antsika,

8. Dia tsy maintsy mba mifankatia isika samy isika:

Efa tia antsika manko Andriamanitra.

9. Fa tsy nisy olombelona na oviana na oviana

Ka hoe nahita maso an’Andriamanitra.

10. Raha mifankatia isika no honenan’Andriamanitra:

i Lavorary ao am intsika ny fitiavany.

Fiv: Fitiavana Andriamanitra!

TENIN’ANDRIAMANITRA (V.)Asa 2,32-36

I Jesoa dia natsangan’Andriamanitra ho velona; vavolombelon’izany izahay rehetra.

Ary nony efa nasandratry ny Tanan-kavanan’Andriamanitra Izy, dia nandray avy

tamin’ny Ray ny Fanahy Masina nampanantenaina, ka nampidina Azy araka izao

hitanareo sy renareo izao. I Davida izay tsy niakatra velively tany an-danitra anefa

nanao hoe: „Ny Tompo nilaza tamin’ny Tompoko hoe: Mipetraha eto ankavanako

ambar-panaoko an’ireo fahavalonao ho fitoeran-tongotra eo ambany tongotrao“.

Koa amin’izany ary, aoka ho fantatry ny taranak’i Israely rehetra marimarina fa

iny Jesoa nofantsihanareo tamin’ny Hazofijaliana iny no nataon’Andriamanitra ho

Tompo sy Kristy.