Fransoa avy any Paola (Paola, 27 martsa 1416 – Tours, 2 aprily 1507) dia relijiozy italiana izay nasandratry ny papa Leon X ho olomasina ny taona 1519. Mpitoka-monina izy ary nanorina ny "Ordre de Minimes". Mpino mafana fo i Giacomo sy Vienne ray aman-dreniny. Izy no lahimatoa rehefa niriana nandritra ny taona maro. Nangataka mafy ny hanan-janaka ireo ray aman-dreniny ireo ka nanankina izany tamin'ny vavak'i Md Fransoà avy any Asizy. Nony teraka ary ny zaza voalohany dia nantsoin'izy ireo hoe Fransoà. Nanan-jandry roa i Fransoà taty aoriana.
Zaza farofy i Fransoà fony fahakely. Narary maso mafy izy vao roa volana monja ka nivavaka indray ny fianakaviana ary nanao voady fa raha sitrana izy dia halefany herintaona hivavaka any amin'ireo Relijiozy Fransiscains. Sitrana tokoa izy ka nony feno 13 dia nandeha niditra nihiboka nivavaka herintaona. Nanovozany fitiavam-bavaka lalina io fotoana io ka vao nivoaka tao izy dia niaraka tamin'ny fianakaviany tamin'ny fivahinianana masina maro toa ny tany ASsise, Loreto, Rome sy ny hafa.
Tao anatin'ny fahatanorana tanteraka i Fransoà no nanomboka nitoka-monina nivavaka. Nony feno 18 taona izy dia nisy ireo mpivavaka hafa izay resy lahatra tamin'ny fitiavam-bavaka sy ny fanetren-tena nananany ka niara-nitokana taminy. Nandritra izany no nanorenany ny toeram-pivavahana sy toeram-pitokanana izay nanombohany ny ankohonam-piainana antsoina hoe "Les Minimes" (izany hoe ireo madinika indrindra). Vao 19 taona monja izany izy no namorona ity fikambanana ity..
Niainana fiainana feno fahatsorana hatrany hatrany i Fransoà, ary ny fitiavam-bavaka nananany dia nampitombo finoana ireo manodidina azy ka maro tamin'izy ireo no niantso azy sahady ho toy ny olomasina. Maro noho izany ireo marary nangataka hositraniny ka sitrana. Izany lazany izany indrindra no niantsoan'ny mpanjaka frantsay Louis XI azy ho any Frantsa noho ity mpanjaka ity narary mafy. Nahazo tso-drano tamin'i Fransoà ny mpanjaka nialoha ny nahafatesany. Nitoetra maharitra tao Frantsa, nifanerasera tamin'ireo mpanjaka nifandimby i Fransoà ka nahafahany nanamboatra toby vitsivitsy ho an'ny relijiozy namany izany. Tany Frantsa tao Tours izy no maty.
Modelin'ny fitiavam-bavaka sy ny fifehezan-tena i Fransoà ho an'ny Fiangonana. Ny papa Louis X no nanangana azy ho olomasina tamin'ny taona 1519.