Handeha an-kafaliana hanatrika an'Andriamanitra aho e
Any an-tendrombohitra masina,
Ny tebitebin-tsaiko, ny ahiahim-poko e, ny hadisoako e
Tsy mahasakana ahy tsy hanatona anao, Tompo ô.
(Eks. 3,7-14)
1 Hitako ny fahorian'ny vahoakako any Ejipta,
Henoko ny sentosento sy ny tarainany;
Ka irahiko ianao mba handeha hanafaka azy e,
Fa homba anao hatrany hatrany anie aho.
2 Eny, ry Tompo, fa iza moa no anaranao?
Ary omeo famantarana aho fa irakao,
Tsotra dia tsotra ny anarako, hoy ny Tompo e:
"Andriamanitra velona" hoe no naniraka anao.
(Rm. 8, 14-17)
3 Efa naniraka ny Zanany tiany Andriamanitra,
F'izany no nanambaràny ny tena fitiavany;
Nanangana antsika tao amin'ny Fanahiny izy e,
Nanandratra antsika hiara-mandova amy Zanany.